اسلام آباد۔ 23ستمبر (اے پی پی) وزیراعظم نا سٹریٹجک ریفارمز یونٹ ایف آئی اے نا کمک اٹ سوشل میڈیا غا بدسلوکی و ٹرولنگ نا رپورٹنگ اٹی زالبول آتا کمک و آسراتی فراوان کننگ کن اسہ ورچوئل ورکشاپ اس اڈتس۔ وزیراعظم نامیڈیا ونگ انا کنڈآن جمعہ نادے آ جاری بیان نا رداٹ ورکشاپ اٹی بشخ ہلوک آتے دا باوری کرفنگا کہ سائبر کرائم کیس آتا بارواٹی آگاہی و زوت آن زوت ایسری کن اسہ ویمن فورم اس وزیراعظم نا سٹریٹجک ریفارمز یونٹ و فیڈرل انویسٹی گیشن ایجنسی نا چاروکی ٹی جوڑ کننگ نا ڈٹ ءِ۔ داڑتون اوار اوار زالبول آتا غٹ تپہ بشمول طالب علم، اُرائی زالبول و مچ آ ملک انا سرکاری و نجی ادارہ غاتیٹی کاریم کروک آ زالبول آتیکن ہم داوڑنا ورکشاپ آتا چرجوئی نا بناءِ کننگک۔ وزیراعظم نا سٹریٹجک ریفارمز نا سروک سلمان صوفی داوخت آ زالبول آتا برخلاف راج اٹی ودوک آ بیدادی و سائبربلنگ نا واقعہ غاتا ذکر ءِ کرے۔ اوپارے کہ زالبول آتا برخلاف بدسلوکی جہانی راجی ءُ ویل ءُ۔ اوپارے کہ دُن تو سوشل میڈیا پرتشدد زالبول و نرینہ ہڑتوم آتے زہمی کننگ کیک ولے زالبول آک دانا جتا و زیات تکلیف دہ حالیت آتا گواچی مریرہ۔ سلمان صوفی پارے کہ دا حالیت آک اسہ نیاڑی اسے کن آخبتی صدمہ اس جوڑ مننگ کیرہ ہرانا نتیجہ ٹی او ذہنی جان جوڑی نا چیلنج آتون منسلک شکی گری، ذلیل ، ایذار سانی و بدنامی نا خوف و ڈپریشن ناگواچی مننگ کیرہ۔ ورکشاپ اٹی سرکاری و نجی ادارہ غاتیٹی کاریم کروک آ زالبول آتا اسہ بھلو کچ اس بشخ ہلکر و تینا آزموندہ و گڑتی تیان بشخ ہلوک آتے معلومدار کریر۔ ایف آئی اے نا ریسورس پرسن، ایڈیشنل ڈائریکٹر و ڈپٹی ڈائریکٹر سائبرکرائم نا پالیسی فریم ورک و رپورٹنگ نا وڑوڈول نا بارواٹی فورم ء، معلومدار کریر و زالبول آتا است بڈی ءِ کریر کہ او داوڑنا واقعہ غاتیا چُپ مفس بلکن توار بڑز کیر و سائبر بلنگ نا چٹفنگ اٹ کمک کن داوڑنا کیس آتے پورو کیر۔
