نیویارک۔ 23 ستمبر (اے پی پی) وزیراعظم محمد شہباز شریف دنیا نا ہزگار ملک آتیان خواست کرینے کہ او پاکستان ءِ وام تیٹی ریلیف ایتر انتئے کہ چاگڑدی بدلی تا سوب آن بروک آ بدترین نوکاپ آن انفراسٹرکچر بھس مس، لکھ آ مخلوق بے اُرا مسنو، فصل آک بھس مسنو، دنیا داحالیت آتیٹی ننا دمدستی کمک ءِ کے، پاکستان بیرہ تینا وسیلہ غاتے اٹ دا حالیت آتا مقابلہ ءِ کننگ کپک، بروک آ اِرا تُو اٹی پاکستان ءِ وام تا قسط آتے ادا کروئی ءِ وخت اس کہ نوکاپ آن ننا زرگزران ءِ بھاز نسخان رسینگانے۔ جمعہ نادے آ ’’بلومبرگ‘‘ ءِ انٹرویو ٹی وزیراعظم شہباز شریف پارے کہ داوخت آ اودے تینا ملک اٹی مروئی ئسک انتئے کہ پاکستان اٹی نوکاپ آن لکھ آ مخلوق زہمی ءِ، اوفتے ریلیف نا گرج ءِ ولے ای دنیا ءِ حالیت آتیان معلومدار کننگ کن بسونٹ، پاکستان ءِ موسمیاتی بدلی تا سوب آن بدترین نوکاپ مون تروک ءِ، موسمیاتی بدلی تا سوب جوڑ مروک آ تیٹی ننا بشخ مفننگ نا بریبر ءِ ولے پاکستان غٹ آن زیات زہمی ملک آتیٹی اوار ءِ۔ وزیراعظم پارے کہ نوکاپ آن 33 ملین مخلوق زہمی مسنے، 400 چناڑتون اوار 1500 بندغ نوکاپ نا گواچی مسنو، لکھ آ ایکڑ آ سلوک فصل آک بھس مسنو، 10 لکھ اُرا پورو وڑاٹ بھس مسنو وخت اس کہ جزوی وڑاٹ زہمی مروک آ اُراتا کچ ہم لکھ آتیٹی ءِ۔ وزیراعظم پارے کہ او اقوام متحدہ نا سیکرٹری جنرل تون اوار جہانی راہشون تے داحالیت آتیان معلومدار کرینے و اوفتے پارینے کہ پاکستان تنیا داحالیت آتون مون تننگ کپک، اقوام متحدہ نا سیکرٹری جنرل تینٹ پاکستان نا دورہ ءِ کرسا حالیت آتا جاچ ءِ ہلک و پارے کہ او داوڑنا بھسکاری مہالو خنتنے۔ وزیراعظم پارے کہ ترک صدر رجب طیب اردوان ، امریکی صدر جوبائیڈن و فرانس نا صدر ایمانویل ماکروں تون اوار جہانی راہشونک دا بابت اقوام متحدہ ٹی تینا تقریر آتیٹی ہم خیال آتا درشانی ءِ کرینو وزور شاغانو کہ پاکستان ءِ داوخت آ بھلو کمک اسے نا گرج ءِ۔ وزیراعظم پارے کہ دنیا ننا ہراکمک ءِ کرے اوڑآ منت واری ءِ ہرفنہ ولے ننے داکان بھاز زیات و دمدستی کمک نا گرج ءِ ، لکھ آ چناک ناجوڑی تیٹی اختہ مننگ ءُ ، سلوک آ دیر آن دینی مرض آک تالان مننگ ءُ، زہمی علاقہ غاتیٹی کمبل، خور خاص وڑاٹ چناتا غذا نا گرج ءِ، نوکاپ آن مروک آ نسخان تا کساس ءِ 30 ارب ڈالر خلنگانے، ننے مخلوق نا بحالی و تعمیر نو کن کمک نا گرج ءِ، زہمی تا دُوارہ آبادکاری ءِ کروئی ءِ و کشت وکشار و صنعت ءِ بحال کروئی ءِ ، داوڑنا حالیت آتیٹی دنیا ننے گوجالنگ کپک۔ وزیراعظم دنیا نا شونہال ملک، آئی ایم ایف و جہانی بینک آن خواست کرے کہ پاکستان ءِ وام تا زرتس اٹی ریلیف تننگے انتئے کہ بروک آ اِر اتُو اٹی پاکستان آ وام تا زرتس نا بھلو زمواری اسے ، ساڑی ہی ٹی آئی ایم ایف تون سخت شڑت آتیا معاہدہ مسنے ہر تُو بجلی و پیٹرولیم آ خراج خلوئی تمنگ ءِ ، پاکستان کن دا بھاز مشکل ءُ حالیت اسے خاص وڑاٹ داوڑاٹ وخت اس کہ نوکاپ زہمی تا بحالی و تعمیر نو نا چیلنج مون تروک ءِ۔ وزیراعظم پارے کہ جہانی کہول آ پیٹرولیم مصنوعات آتا نہاد آک بے گمانی وڑاٹ بے تحاشہ ودانو، یخ آتیکن گیس انا کاختی ءِ ، شون ہلوک قومک و ملک آتے ننے آن اومیت آتے وابستہ کننگ نا جاگہ غا ساڑی حالیت آتیا ننا کمک ءِ کروئی مریک۔ اسہ سوج اسے نا ورندی ٹی وزیراعظم پارے کہ روس نا صدر اوڑدہی ٹی گیس انا فراوانی نا بابت جاچ ءِ ہلنگ نا باوری کرفینے ولے داتم اسکان دا بابت ہچ ءُ کمٹمنٹ اس متنے، پاکستان روس آن خولم نا ہلنگ نا ہم خواہندار ءِ انتئے کہ نوکاپ نا سوب آن ڈغار خولم تا دسفنگ کن تیار مننگ کپک ۔ وزیراعظم پارے کہ دنیا ننا کمک ءِ کننگ اٹ ہرے کرے تو انسانی المیہ ودی مننگ کیک۔ پاکستان نا سیاسی حالیت آتا بابت اسہ سوج اسے نا ورندی ٹی وزیراعظم پارے کہ ننے سیوت، یکجہتی ، مصالحت و امن نا گرج ءِ ، ساڑی آ حالیت ننے آن اخوت و اسہ ایلو تون تفنگ نا خواست کیک، داوخت تین پہ تینی اختلاف و سیاست نا اف، انسانیت نا خذمت و زہمی تا کمک کن اواری اٹ کاریم کننگ نا ءِ، نوکاپ زہمی تے کمبل، دوائی، تمبو ، خور انا گرج ءِ، ننے ذاتی پسند و ناپسند مرسا مون آہنوئی مریک۔ وزیراعظم پارے کہ دنیا دا مشکل حالیت آتیٹی ننا کمک کن مون آ برے انتئے کہ موسمیاتی بدلی آن اینو نن زہمی اُن تو پگہ پین اس ہم مننگ کیک۔ بھارت تون تعلقداری نا بابت اسہ سوج اسے نا ورندی ٹی وزیراعظم پارے کہ پاکستان و بھارت ہمسایہ ملک ءُ و ننے پرامن ہمسایہ غاتا وڑاٹ رہینگوئی ءِ، امن نا اسٹ انگا کسر ءِ ہرانا کمک اٹ نن تینا الس نا زند ءِ گچین جوڑ کننگ کینہ ، پاکستان و بھارت گپ وتران نا کمک اٹ تینا تین پہ تینی جھیڑہ غاتے طے کننگ کیرہ۔
