اقوام متحدہ۔ 23 ستمبر (اے پی پی) اقوام متحدہ نا سیکرٹری جنرل انتونیوگوتریس پارینے کہ موسمیاتی بدلی نا سوب آن پاکستان نا اسہ تہائی بشخ اس نوکاپ اٹ ڈبنگا، ننے غٹ ءِ اواری اٹ تالان کروک آ کچٹی نا نہاد ءِ ادا کروئی مریک۔ شون ہلوک ملک آک موسمیاتی فنانس نا 100 ارب ڈالر نا فراوانی نا قول ءِ پورو کیر، آفت آتون مون تننگ کن فنانس نا گرج ءِ ، داخیال آتا درشانی ءِ او اسہ ویڈیو کلہو اسے ٹی کرے ہراٹی او موسمیاتی بدلی کانفرنس اٹی ویل آتا ایسری کن پیش رفت آ زور شاغانے۔ اوپارے کہ مصر اٹی مروک آ اقوام متحدہ نا موسمیاتی بدلی کانفرنس اٹی بھلو پیش رفت اس بایدے مرے و ننے دمدستی وڑاٹ موسمیاتی نسخان تے بامعنی و قابل اعتبار وڑاٹ ایسر کننگ نا گرج ءِ۔ اوپارے کہ الائنس آف سمال آئی لینڈ سٹیٹس بھلو وخت اسے آن آب و ہوا نا بابت گنج اس کاریم کرینے و داسہ ننے چاگڑدی ویل آتے ایسر کننگ نا مست آن بھاز زیات گرج ءِ۔ اوپارے کہ نوکاپ آن پاکستان نا اسہ تہائی بشخ اس ڈبنگانے ، اگہ نن 1.5ڈگری آن مون آ ہنان تو نن کیہی ملک آتا خوفناک آخبت نا تصور ءِ کننگ کینہ۔ اوپارے کہ ننے کوپ 27 ہدف آ جہانی ردعمل نا گرج ءِ، ہراٹی موسمیاتی بدلی تا سوب آن مروک آ نسخان نا مالی کمکاری ہم اوار ءِ۔ اوپارے کہ ننے غٹ ءِ اواری اٹ تالان کروک آ کچٹی نا نہاد ءِ ادا کروئی مریک و داڑکن ننے فنانس اسکان رسینگ نا گرج ءِ۔ اوپارے کہ اقوام متحدہ قابل تجدید توانائی نا انقلاب تون اوار اوار شون ہلوک ملک آتیا زور شاغسا کیک کہ او پدتموک ملک آتا مالی کمک ءِ کیر و اوفتے ٹیکنالوجی نا فراوانی ءِ پک کیر۔ اوپارے کہ نن شون ہلوک ملک آتے 100 بلین امریکی ڈالر نا موسمیاتی فنانس نا قول ءِ پورو کننگ کن زور شاغسا کینہ۔
