اقوام متحدہ۔ 23 ستمبر (اے پی پی) بنجائی وزیر حوالکاری و شینکاری مریم اورنگزیب پارینے کہ گلوبل وارمنگ و موسمیاتی بدلی مچ آ دنیا نا اسیجائی ویل ءِ، پاکستان اٹی داوخت آ نوکاپ نا سوب ہیلتھ ڈیزاسٹر ءِ، یخ آک بننگ والا ءُ، نوکاپ زہمی تے دوائی، کمبل، باسن ءُ پچ و چادر پین پین نا سخت گرج ءِ ، ہرافک نوکاپ زہمی تا کمک ءِ کننگ خوار او تینا منشااٹ تینٹ، این ڈی ایم اے و سول سوسائٹی نا کمک اٹ کمک کننگ کیرہ۔ جمعہ نادے آ داڑے اقوام متحدہ سیکرٹریٹ لابی ٹی وزارت حوالکاری و شینکاری نا کنڈآن ’’پاکستان اٹی نوکاپ۔ موسمیاتی بدلی‘‘نا سرحال آ اڈ ہلوک عکسی نمائش نا دورہ نا وخت آ میڈیا تون گپ وتران کرسا بنجائی وزیر حوالکاری مریم اورنگزیب پارے کہ نوکاپ زہمی علاقہ غاتیٹی چندی زالبول آک اومیت اٹی ءُ، داوخت آ ہموڑے چناتا پال، بے بی فوڈ اتون اوار ایلو گڑاتا سخت گرج ءِ۔ اوپارے کہ وزیراعظم سندھ و بلوچستان اٹی تمبو تا بشخنگ نا بابت پارت جاری کریسس، دا علاقہ غاتیٹی زہمی تا گرج انا رداٹ تمبو بشخنگ انگ ءِ۔ اوپارے کہ این ڈی ایم اے ہڑدے ئی بنداو آ الس ءِ تینا ڈیٹا ءِ فراوان کیک و الس ءِ معلومدار کننگک کہ ہراجاگہ غا ہراگڑانا گرج ءِ۔ بنجائی وزیر حوالکاری پارے کہ نوکاپ زہمی تیکن غٹ کوشست آتے کاریم اٹ اتنگ انگ ءِ، تدوک آ دے وزیراعظم نوکاپ زہمی تا بابت جاچ دیوان نا کماشی ءِ کرے ہراٹی معلوم مس کہ پیناڈول و پیراسیٹامول نا کمتی ءِ۔ اوپارے کہ نوکاپ نا سوب آن تالان مروک آ ناجوڑی و ڈینگی نا سوب آن پیناڈول و پیراسیٹامول نا کھپت اٹی ودکی مسنے، دادوائی تا ڈیمانڈ زیات و پیدوار کم ءِ وخت اس کہ پیدواری خڑچ ہم زیات ءِ۔ اوپارے کہ وزیراعظم پیدوار وڑاٹ پارت کرینے کہ د ادوائی تا نہاد آتیٹی ودکی کننگپک، وزیراعظم وزارت خزانہ ءِ دا دوائی تیا سبسڈی تننگ نا پارت کرینے۔ بنجائی وزیر حوالکاری پارے کہ ہرا این جی اوک بند ءُ اوفتا سکریننگ نا پراسیس وزارت داخلہ بناءِ کرینے، نوکاپ زہمی علاقہ غاتیٹی داوخت آ این جی او و سول سوسائٹی بھاز جوان کاریم کننگ ءِ ہرانا وزیراعظم ہم ستاءِ کرینے وخت اس کہ السی کہول آ ہم اوفتا ستاءِ کننگ انگ ءِ۔ اوپارے کہ مچ آ دنیا ٹی سول سوسائٹی نا اسہ کڑد اسے، ہراتم حکومتی کوشست آتیٹی دا کڑد اوار مریک تو ہروڑنا ڈیزاسٹر تون مون تننگ مریک۔ مریم اورنگزیب پارے کہ حکومت نا داوخت آ چکار نوکاپ زہمی علاقہ غاتا بحالی آٹی ءِ ، گلوبل وارمنگ و موسمیاتی بدلی نا بابت وزیراعظم جہانی کہول آ توار بڑز کرینے ہرا مچ آ دنیا نا اسیجائی ویل ءِ۔
