نیویارک۔22ستمبر (اے پی پی): مزن وزیر محمد شہباز شریف ءَ سعودی عرب ءِ علی عہد ءُ نائب مزن وزیر محمد بن سلمان بن عبدالعزیز السعود ءَ پنچ شمبے ءِ روچ ءَ ٹیلی فون ءِ سر ءَ گپ ءُ تران کت۔ مزن وزیر ءَ شہزادہ محمد بن سلمان ءَ را سعودی عرب ءِ 92 نود ءُ دوھمی راجی روچ ءِ پد ءَ مبارک بات دات۔ مزن وزیر ءَ خادم الحرمین الشریفین شاہ سلمان بن عبدالعزیب ءُ سعودی عرب ءِ الس آنی واستہ نیکیں واھگ ءُ واھشت آنی درشان کت۔ آئی ءَ سعودی عرب ءِ براتیں الس آنی یک شلیں دیمروئی ءُ واھشت آنی واستہ ھم نیکیں واھشت ءِ درشان کت۔ مزن وزیر محمد شہباز شریف ءَ سعودی ولی عہد ءَ را پاکستان ءَ استیں سیلاپ ءِ جاور ھال ءُ کمک برجا کنگ ءِ کوشست آنی بابت ءَ ھم سرپد کت۔ مزن وزیر ءَ ”کنگ سلمان ہیومینیٹیرین ایڈ اینڈ ریلیف سینٹر” ءِ نیمگ ءَ سیلاپی دمگ آنی تہءَ پجاری کتگیں کمک، کمکی سامان آنی شنگ ءُ رتالان ءِ واستہ ” اسپیس پل” ءِ جوڑیشت ءُ پاکستان ءِ سیلاپ ءِ آماچیں مردم آنی واستہ الس ءَ چہ کمک گرگ ءِ واستہ سعودی عرب ءِ ”ساھم” پورٹل ءِ بنگیج ءِ پد ءَ خادم الحرمین الشریفین ءِ شگر ءُ منت واری گپت۔ سعودی ولی عہد ءَ پاکستان ءَ نہ وشیں ھور ءُ نہ وشیں ھار آنی سبب ءَ الس ءِ گران بھائیں جانی تاوان ءُ زریعہ ماش ءُ ماڑی ءُ مڈی آناں رستگیں تاوان بار آنی پد ءَ اپسوزی ءِ درشان کتگ۔ مزن وزیر ءَ پاکستان ءِ واستہ سعودی عرب ءِ یک شلیں کمکءُ ھمبراہ داسری ءَ را ساڑات ءُ ولی عہد ءَ را دوئیں براتیں ملک آنی نیام ءَ ھاٹیگ ءِ شوبگ ءَ پراھ ءُ شاھیگانیں سرمایہ کاری ءُ شریکدار ی کار رھبند آنی بابت ءَ جاڑیگیں دیمروئی گام آنی بابت ءَ سرپد کت۔ دوئیں سروک آں وت مہ وت نزیکیں کنگ ءِ ھوالگ ءَ تپاک کت۔
