نیویارک۔ 22 ستمبر (اے پی پی) وزیرخارجہ بلاول بھٹو زرداری نیویارک اٹی اقوام متحدہ نا جنرل اسمبلی نا 77 می دیوان نا وخت آ CoP-27نا گول میز کانفرنس اٹی بشخ ہلک۔ دفترخارجہ نا رداٹ وزیرخارجہ پارے کہ موسمیاتی بدلی غٹ قوم و مخلوق کن اسہ بھلو خطرہ اسے، دانا مضمرآک پیدوار و ترند مرسا کننگ ءُ ہرانا درشانی پاکستان اٹی ساڑی آ تباہ کن نوکاپ آن مریک۔ اوپارے کہ جہانی کہول آ گرین ہاؤس گیس آتا پیش تمنگ اٹ کم آن کم بشخ آن پد ہم پاکستان ءِ باسنی نا ریسہ، برفانی طوفان، خشک سالی ، طوفانی پِر و ترند بشام نا حالیت اٹی قدرتی آفت مون تروک ءِ ہرانا نتیجہ ٹی پاکستان ءِ انسانی جان تا زیان آن بیدس زرگزرانی نسخان مون تروک ءِ۔ وزیرخارجہ پاکستان اٹی ساڑی آ نوکاپ آن مروک آ بھسکاری تا ذکر ءِ کرسا پارے کہ داڑآن جانی و زرگزران ءِ نسخان تتون اوار اوار اہم انفراسٹرکچر ءِ بھلو کچ اسے آ نسخان مسنے۔ اوپارے کہ زرگزران ءِ 30 ارب ڈالر آن زیات نا نسخان مسنے۔ وزیرخارجہ ہندا تُو انا ول اٹی پاکستان تون یکجہتی نا درشانی ءِ کننگ کن اقوام متحدہ نا سیکرٹری جنرل نادورہ پاکستان آ اونا منت واری ءِ ہرفے و چندی ملک آتا راہشون آتا کنڈآن اوڑدہی ٹی درشان کروک جوزہ غاتا ستاءِ کرے۔
