نیویارک۔ 22 ستمبر (اے پی پی) وزیر مملکت خارجہ امور حنا ربانی کھر پارینے کہ پاکستان اقلیت آتا رکھ انا مون آ دننگ و رکھ ءِ بھاز اہمیت ایتک، پاکستان نا آئین اٹی اوفتا حق انا رکھ ءِ کننگانے و عدلیہ اوفتے برقرار تخانے۔ وزیر مملکت داہیت ءِ نیویارک اٹی امریکی سفیر جہانی مذہبی آجوئی رشاد حسین تون اوڑدہی ٹی پارے۔ اوپارے کہ پاکستان نا پارلیمنٹ اقلیت آتون اوار غٹ شری تا انسانی حق انا رکھ ءِ بھاز سنجیدگی اٹ ہلیک، مذہبی گیشتری پاکستان نا واک ءِ و مذہبی اقلیت آک پاکستان نا راجی و اقتصادی شونداسری ٹی اہم ءُ کڑد اس ادا کننگ اٹی ءُ۔ اوپارے کہ پارلیمنٹ، عدلیہ و خذمت آتیٹی اوفتا نمائندگی ءِ، اوفتے سیاسی وڑاٹ مربوط کننگ و اوفتا نمائندگی ءِ ودفنگ نا شعوری کوشست کننگ انگ ءِ۔ وزیر مملکت پارے کہ بھارت اٹی ودوک آ بے سگی، انتہاپسندی واقلیت آتیا ظلم و ستم و بھارت نا غیر کانودی کوزہ گیری ٹی جموں وکشمیر اٹی کشمیری تا برخلاف پدریسہ جور جہانی برادری خاص وڑاٹ امریکہ کن گڑتی نا بایدے سوب مرے۔ رشاد حسین پاکستان اٹی تباہ کن نوکاپ نا سوب آن نہادی جان تا نسخان آ ہڑزخواہی کرے و ملکیت و انفراسٹرکچر نا بھسکاری آ است ہسونی نا درشانی ءِ کرے۔ اومذہبی آجوئی نا بابت باندات آتیا امریکہ تون پاکستان نا پدریسہ رابطہ غاتا ستاءِ کرے۔
