نیویارک۔ 22 ستمبر (اے پی پی) وزیرخارجہ بلاول بھٹو زرداری تون اقوام متحدہ نا جنرل اسمبلی نا 77 می دیوان نا وخت آ نیویارک اٹی ڈنمارک نا وزیرخارجہ جیپے کوفوڈ تون اوڑدہی کرے۔ دفترخارجہ نا رداٹ ہڑتوم آ وزیرخارجہ غاک ڈنمارک و پاکستان نا نیام اٹ اقتصادی تعلقداری آ گپ وتران کریر ہرافتے ٹی تدوک آ دہائی ٹی پدریسہ ودکی مسنے۔ ہڑتوم آ وزیر خارجہ غاک ہڑتوم آ کنڈآتا تعلقداری تے پین سوگو کننگ کن خڑکی کمکاری ءِ برجاتخنگ نا است خواہی نا درشانی ءِ کریر۔ پاکستان ڈنمارک ءِ اسہ اہم ہڑتوم آ کنڈآتا پارٹنر تون اوار اوار یورپی یونین نا اہم باسک انا وڑاٹ اہمیت ایتک۔ وزیرخارجہ ڈنمارک تون پاکستان نا سیاسی تعلقداری تے پین سوگو کننگ، اقتصادی تعلقداری تے ودفنگ و تعلیمی کمکاری ءِ ودفنگ نا عزم انا درشانی ءِ کرے۔ وزیرخارجہ پارے کہ ڈنمارک پاکستان ءِ اقتصادی وڑاٹ خاص وڑاٹ قابل تجدید توانائی نا بشخ اٹی اوار کننگ و ڈنمارک نا کمپنیک پاکستان اٹی قابل تجدید توانائی نا مارکیٹ اٹی پترینگ انگ نا است خواہی تخرہ۔ وزیرخارجہ زور شاغا کہ جہانی برادری اوغان ءِ است آن دپ و اوغانستان مون تروک سنگین انسانی حالیت آتون مون تننگ کن یکجا مرے۔اوپارے کہ پاکستان اوغانستان نا الس کن انسانی امداد نا فراوانی ءِ برجاتخانے۔ وزیر خارجہ مقبوضہ کشمیر اٹی انسانی حق انا بھلا خلاف ورزی تا کنڈآ ہم چکار کرفے۔ وزیرخارجہ بلاول بھٹو زرداری پاکستان اٹی ساڑی آنوکاپ نا رداٹ ڈنمارک نا کمکی امداد نا ہم ستاءِ کرے۔
