نیویارک۔ 22 ستمبر (اے پی پی) وزیر مملکت امور خارجہ حنا ربانی کھر تون امریکی محکمہ خارجہ نا سیاسی امور نا انڈر سیکرٹری وکٹوریہ نولینڈ اقوام متحدہ نا جنرل اسمبلی نا وخت آ اوڑدہی کرے۔ اوڑدہی ٹی وزیر مملکت حنا ربانی کھر 55 ملین ڈالر نا امداد نا کمک اٹ پاکستان نا نوکاپ زدگان تتون یکجہتی نا درشان آ امریکی حکومت نا منت واری ءِ ہرفے۔ اوپارے کہ امریکی کانگریس نا ڈل و امریکی کمامدارآتا پاکستان نا ساڑی آ دورہ، نوکاپ زدگان و پاکستانی الس کن امریکی ہمدردی نا ڈیک ءِ ایتک۔ اوانڈر سیکرٹری ءِ نوکاپ آن مروک آ بھسکاری تیان معلومدار کرے ہراڑآن 33 ملین بندغ براہ راست زہمی مسنو۔ وزیر مملکت امور خارجہ پارے کہ دُن تو پاکستانی زیاری گیس آتا جہانی اخراج نا اسہ درسد آن ہم کم انا زموار ءِ ولے اودے موسمیاتی تنکی مون تروک ءِ۔ اوحکومت نا کمکی کوشست آتا ذکر ءِ کرسا پارے کہ تعمیر نو و بحالی کن جہانی برادری نا کنڈآن مریس مدتی امداد نا گرج مریک۔ حنا ربانی کھر داہیت آ زور شاغا کہ پاکستان و امریکہ نا نیام اٹ تین پہ تینی پت و شرف آ مبنی واپار و زرکاری و السی رابطہ غاتا بشخ آتیٹی ہڑتوم آ کنڈآتا تعلقداری تے پین ودفنگ نا بے پناہ گمان ساڑی ءِ ۔ وزیر مملکت بھارت اٹی انسانی حق انا بھلا حالیت آتا ذکر ءِ کرسا علاقائی امن و سوگوی کن جموں و کشمیر نا جھیڑہ نا ایسری نا مرکزیت آ زور شاغا و پارے کہ بھارت تینا غیرکانودی کوزہ گیری ٹی جموں وکشمیر اٹی کشمیری تیا وحشیانہ ظلم کننگ ءِ۔ امریکی انڈر سیکرٹری وکٹورییہ نولینڈ پاکستان اٹی ترند نوکاپ نا سوب آن نہادی جان تا زیان آ ہڑزخواہی نا درشانی ءِ کرسا پارے کہ امریکہ تعمیر نو و بحالی نا عمل اٹ پاکستان نا کمک ءِ کیک۔ اوداہیت انا ہم درشانی ءِ کرے کہ امریکہ موسمیاتی بدلی، جان جوڑی، توانائی و واپار و زرکاری تون اوار چندی بشخ آتیٹی پاکستان تون گپ وتران ءِ ودفک۔ وزیر مملکت علاقائی حالیت آتیا ہم گپ وتران کرے و اوغانستان واوڑآن پیشن امن، شونداری وسوگوی نا گرج آ زور شاغا۔
