اسلام آباد۔ 22 ستمبر (اے پی پی) پاکستان ہائی ٹیک ہائبر ڈرائس ایسوسی ایشن (پی ایچ ایچ ایس اے) نا چیئرمین شہزاد علی ملک پارینے کہ پاکستان اٹی ساڑی آ نوکاپ آن سندھ اٹی برنج نا 80 درسد و سویلی پنجاب اٹی 60 درسد فصل آک بھس مسنو، داکان بیدس انفراسٹرکچر ، سڑک، پول آک پنانو و ملک انا نوکاپ زدہ علاقہ غاتیٹی زرگزران پورو وڑاٹ بھس وخت اس کہ ریکارڈ کچ اٹی مخلوق ہمپنگ آ بیوس مسنو۔ پنچ شنبےنادے آ داڑے ایسوسی ایشن ناایگزیکٹیو کمیٹی نا دیوان نا کماشی ءِ کرسا اوپارے کہ سندھ اٹی برنج نا دسنگ نا علاقہ غاتیٹی غٹ آن زیات نوکاپ ریکارڈ کننگا ہرانا سوب آن 18 لکھ ٹن برنج نا نسخان مس یا اونا 80 درسد گمانی پیدوار نا نسخان مس۔ سویلی پنجاب اٹی ہم ہندااست ہسون آ حالیت ءِ و برنج نا فصل ءِ 60 درسد نسخان رسینگانے۔ اوپارے کہ سندھ انا کرپاس و گنڈیری نا زون اٹی نوکاپ کم مسنے۔ ولے ہڑتوم آ زون تیٹی ہڑدے ئی بنداو آ بھاز پِر مس ہراڑآن کرپاس نا فصل کم و ود پورو وڑاٹ بھس مس۔ اوپارے کہ بنائی کساس آتا رداٹ ہڑتوم آ صوبہ غاتیٹی سوزی و ساہدار تتون اوار ہرمسٹ آ واپاری فصل آتیان کم از کم 3 بلین امریکی ڈالر نا نسخان مسنے۔ اوپارے کہ نوکاپ نا سوب آن ملک اٹی خور انا درآمد اٹی ودکی کروئی مریک ہراڑے 43 درسد آبادی مہالو آن غذائی بے رکھی نا گواچی ءِ۔ نوکاپ نا نتیجہ ٹی درآمد زیات، برآمد کم و کبینی زیات مننگ کیک ہراڑآن زرگزرانی سوگوی نا کوشست آتے نسخان رسینگک۔ شہزاد علی ملک سندھ و پنجاب نا حکومت آتیا زور شاغا کہ او دھان نا ساڑی آ سلوک فصل آتے بچفنگ کن درکار دیر انا پوروی دوئی ءِ پک کیر۔ اوپارے کہ نوکاپ آن زہمی غٹ بزغر آتے بے سود وام تننگ نا گرج ءِ تانکہ او مون آ فصل دسنگ کیر۔ اوحکومت آ زور شاغا کہ او کھد، پک مروک بج و رعایتی نرخ آتیا بجلی نا دوئی ءِ پک کے۔
