نیویارک۔ 22 ستمبر (اے پی پی) وزیرخارجہ بلاول بھٹو زرداری ہنگری نا وزیر خارجہ و واپار پیٹرز زیجارتو تون اقوام متحدہ نا جنرل اسمبلی نا 77 می دیوان نا وخت آ اوڑدہی کرے۔ دفترخارجہ نا رداٹ ہڑتوم آ راہشون تا نیام اٹ دا اوڑدہی نیویارک اٹی مس۔ وزیرخارجہ پارے کہ پاکستان ہنگری تون ہڑتوم آ کنڈآتا و یورپی یونین نا رداٹ تینا تعلقداری تے بھاز اہمیت ایتک۔ اوڑدہی ٹی ہڑتوم آ کنڈآتا تعلقداری نا غٹ بشخ آتا احاطہ ءِ کننگا ہراٹی سیاسی ، اقتصادی و واپاری، دودوربیدگ، دفاع و الس تون الس نا رابطہ غاتا بابت امور اوار ءِ۔ ہڑتوم آ فریق آک ہڑتوم آ کنڈآتا تعلقداری ٹی ساڑی آ پیش رفت نا ہم جاچ ءِ ہلکر و چندی بشخ آتیٹی کمکاری ءِ ودفنگ نا است خواہی نا درشانی ءِ کریر۔ ہڑتوم آ کنڈآتا واپاری و اقتصادی تعلقداری ءِ ودفنگ آ خاص چکار کرسا وزیر خارجہ سلاہ پیش کرے کہ ہنگری پاکستان اٹی زرکاردوست چاگڑد آن فائدہ ہرفسا پاکستانی کمپنی تتون خاص وڑاٹ خصوصی اقتصادی زون تیٹی اسیجائی ڈٹ آتا بناءِ کننگ کیک۔ فریق آک تین پہ تینی است خواہی نا علاقائی و جہانی امور نا ہم جاچ ءِ ہلکر۔
