وزیراعظم شہباز شریف اینو اقوام متحدہ نا سیکرٹری جنرل ، بل گیٹس ، چندی جہانی راہشون تتون اوڑدہی کیک

نیویارک۔ 22 ستمبر (اے پی پی) وزیراعظم محمد شہباز شریف اینو( پنچ شنبے نادے آ) اقوام متحدہ نا سیکرٹری جنرل انتونیوگوتریس و مائیکرو سافٹ نا بانی بل گیٹس تون اوار چندی جہانی راہشون تتون اوڑدہی کیک ، وزیراعظم پاکستان اٹی ساڑی آ نوکاپ آن مروک آ بھسکاری تے تالان کننگ کن اقوام متحدہ سیکرٹریٹ اٹی خلوک آ عکسی نمائش نا ہم دورہ ءِ کیک۔ وزیراعظم آفس نا میڈیا ونگ آن پنچ شنبے نادے آ جاری بیان نا رداٹ اقوام متحدہ نا جنرل اسمبلی نا 77 می دیوان نا بڑزکو کہولی شرہ نا مسٹ میکو دے وزیراعظم محمد شہباز شریف نیویارک اٹی سرجزآتیان پبی اسہ پین دے اس گدریفک۔ اقوام متحدہ نا ہیڈ کوارٹر آ روانگی آن مست وزیراعظم محمد شہباز شریف تون بل گیٹس اوڑدہی کیک۔ اقوام متحدہ ہیڈکوارٹر آ سرمننگ آ وزیراعظم، اقوام متحدہ نا سیکرٹری جنرل انتونیوگوتریس تون اوڑدہی ٹی ہڑتوم آ کنڈآتا امور آ گپ وتران کیک۔ اوکان پد وزیراعظم اقوام متحدہ سیکرٹریٹ نا لابی ٹی پاکستان مشن نا کنڈآن پاکستان اٹی ساڑی آ نوکاپ  نا بھسکاری تے تالان کننگ کن خلوک آ عکسی نمائش نا دورہ ءِ کیک۔ پیشیم آ وزیراعظم ایڈتھ لیڈررکوایسوسی ایٹڈ پریس نا اے پی ٹی وی (Associated Press-AP TV)کن انٹرویو اس ایتک۔ اوکان پد وزیراعظم، تینا جاپانی ہم منصب فومیو کیشیڈا، بیلجیم نا وزیراعظم الیگزینڈرڈی کرو ، و ملائیشیا نا وزیراعظم اسماعیل صابری یعقوب تون جتا جتا اوڑدہی تیٹی تین پہ تینی است خواہی نا امور آ گپ وتران کیک۔