نیویارک۔21ستمبر (اے پی پی): مزن وزیر محمد شہباز شریف ء ُ امریکہ ءِ موسمی مٹء ُبدلی ءِ صدارتی نمائندگ جان کیری ءَ موسمی مٹءُ بدلی ءِ جیڑہ ءَ ر اگرء ُدار کنگ ءُ توانائی ءِ پڑءَ سول ء ُ تران ءَ را دیما برگ ءِ سرءَ تپاک کتگ۔ اے تپاکی چارشمبے ءِ روچءَ اقوام متحدہ ءِ جنرل اسمبلی ءِ 77 می دیوان ءِ موہ ءَ مزن وزیر محمد شہباز شریف ء ُ امریکہ ءِ موسمی مٹء ُ بدلی ء ِ صدارتی نمائندگ جان کیری ءِ گندء ُنندءِ وہدءَ بوتگ۔ گندء ُنندءِتہا مزن وزیر محمد ز شہباز شریف ءَ موسمی مٹء ُبدلی ءِ پدمنتگی ءِ ہوالگءَ سرپدی ودی کنگ ءُ ایشی ءَ را گیشءُگیوار کنگ ءِ ھاتر جان کیری ءِ ازمت ساڑاتگ ءُ کلائمیٹ چینج ءِ جیڑہ ءَ را گرء ُ دار کنگءِ ھاترءَ امریکی حکومت ءِ حاسیں کرد ءَ را من اِتگ۔ مزن وزیر ءَ گشتگ کہ پاکستان ءِ میاں اوستمانی گرین گس گیس ءِ درکنگ ءَ یک درسد ءَ چہ ہم کم بہر اِنت۔ ایشی ءَ ابید پاکستان موسمی مٹءُ بدلی ءِ سوب ءَ درستاں چہ آماچیں 10 ملک آنی تہا ہوار اِنت۔ آئی ءَ گشتگ کہ پاکستان آفت ءِ آماچ اِنت، تباہ کنوکیں ہار ءَ چہ 1400 ءَ چہ گیش مردم بیران ءُ سئے کروڑ 30 لکھ مردم بے لوگ بوتگ اَنت کہ آیانی تہا 6 لکھ ءَ چہ گیش لاپ پُری زالبول، 40 لکھ ایکڑ زمین ءِ کشار تباہ بوتگ اَنت وہدے کہ کوچگ ء ُمیتگانی مردمانی روزگار ہلاس بوتگ اَنت۔ جان کیری ءَ پاکستان ءِ اُلس ءُ حکومت ءِ گوما یکوئی ءِ درشانی کتگء ُ ہار ءِ سوب ءَ چہ بوتگیں جیڑہء ُجنجالانی دیمپانی کنگ ءِ ھاترءَ امریکی حکومت ءِ نیمگ ءَ ہمراہ داری کنگ ءِ جزم کتگ۔ آئی ءَ گشتگ کہ امریکہ مضبوط بنیادی ڈھانچہ ءِ جوڑ کنگ ء ُ دومی کمک ءِ دروشم ءَ پاکستان ءِ گوما کمک کنگءَ ساڑی اَنت تنکہ باندات ءَ اے وڑیں پدمنتگی ءَ چہ رکھگ بہ بیت۔ مزن وزیر محمد شہباز شریف ءُ جان کیری ءَ موسمی مٹء ُبدلی ء ُ توانائی ءِ ہوالگءَ سول ءُتران ءَ را دیما برگ ءِ سرءَ تپاک کتگ۔
