نیویارک۔21ستمبر (اے پی پی): مزن وزیر محمد شہباز شریف یونائیٹڈ نیشن ءِ جنرل اسمبلیءِ 77 ھپتاد ءُ ھپتمی دیوان ءِ مزن تکی باست ءُ واست آنی تہءَ بھر زوری ءُ میاں اوستمانی سروک آں گوں دو نیمگی گند ءُ نند ءِ واستہ یونائیٹڈ نیشن ہیڈ کوارٹر روادگ بوتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ دزگٹی ءَ جنرل اسمبلی ءِ دیوان ءِ دومی روچ ءَ ھم دزگٹ بیت۔ یونائیٹڈ نیشن ہیڈ کوارٹرز روادگی ءَ چہ پیسر مزن وزیر محمد شہباز شریف ءَ گوں آئی ایم ایف ءِ منیجنگ ڈائریکٹر کرسٹالینا جارجیو ءُ ورلڈ بینک گروپ ءِصدر ڈیوڈ مالپس گند ءُ نند ھوار انت۔ مزن وزیر پاکستان ءَ سیلاپ ءَ چہ آماچیں دمگ آنی تہ ءَ کمکی چست ءُ ایر آنی سر ءَ چار ءُ تپاسی ءِ واستہ زوم میٹنگ ءِ ھم سروکی ءَ کنت۔ مزن وزیر یونائیٹڈ نیشن ءِ جنرل اسمبلی ءِ 77 ھپتاد ءُ ھپتمی دیوان ءِ صدر ساباکوروسی ءُ یورپی یونین ءِ صدر ارسالا وین ڈرلی این ءَ گوں جتا جتائیں گند ءُ نند کنت۔ مزن وزیر مصر ءِ نیمگ ءَ چہ COP 27 ءِ ھوالگ ءَ برجم بوھوکیں سروک بند کمرہ دیوان ءَ بھر زوری کنت۔ مزن وزیر فن لینڈ ءِ صدر صعولی ننستو ءَ گوں دو نیمگی کار آنی ھوالگ ءَ گند ءُ نند کنت۔ بیگاہءَ مزن وزیر امریکہ ءِ صدر جوبائیڈن ءِ نیمگ ءَ یونائیٹڈ نیشن ءِ جنرل اسمبلی ءِ 77 ھپتاد ءُ ھپتمی دیوان ءِ ھوالگ ءَ برجم بوھوکیں دیوان ءَ بھر زوری ءِ واستہ امریکن نیچرل ہسٹری میوزیم ءَ روت۔
