نیویارک۔ 21 ستمبر (اے پی پی) وزیراعظم محمد شہباز شریف چناتا خور تیا کروک آ ادارہ و کمپنی تیان خواست کرینے کہ او نوکاپ آن زہمی علاقہ غاتیٹی چناتا خور عطیہ کیر، نوکاپ آن بھلو کچ اسے آ بھسکاری مسنے، جہانی راہشون تے نوکاپ نا بھسکاری و پاکستان نا زرگزرانی مشکل آتیان معلومدار کننگ اٹی اُٹ۔ وزیراعظم ہراداوخت آ اقوام متحدہ نا جنرل اسمبلی نا 77 می دیوان اٹی بشخ ہلنگ کن نیویارک اٹی ءِ، نوکاپ زدہ علاقہ غاتیٹی کمکی کارروائی تا بابت تینا کلہو اٹی پارے کہ او تدوک آ نن آن لائن دیوان اٹی نوکاپ نا حالیت آتا جاچ ءِ ہلکونے، نوکاپ آن مچ آ پاکستان اٹی بھسکاری مسنے، صوبائی حکومت، انتظامیہ، سرکاری آفیسر و پاکستان نا فوج نوکاپ آن پد ہرا کوشست و کارروائی تے کرینو، الس نا مون اٹ اوفتا شرف ءِ و اللہ تعالیٰ دامحنت نا صلہ ءِ ایتک۔ وزیراعظم پارے کہ اودے دیوان اٹی معلوم مس کہ نوکاپ زہمی علاقہ غاتیٹی چناتا خور انا کمتی نا ویل مون تروک ءِ۔ وزیراعظم پاکستان نا سخی ادارہ خاص وڑاٹ چناتا خور تیار کروک آ ہندی کمپنی (فوڈ مینو فیکچررز) آن خواست کرے کہ او زہمی علاقہ غاتیٹی چناتا خور عطیہ کے و این ڈی ایم اے ، پی ڈی ایم ایز و پاکستان نا فوج انا کمک اٹ لکھ آ چناتسکان دا خور ءِ سرکے۔ وزیراعظم دین و دنیا نا خیرخواہی کن نوکاپ زہمی تیکن عطیہ تروک آ بندغ و ادارہ غاتا منت واری ءِ ہرفینے و پارینے کہ زہمی خاص وڑاٹ چناو اوفتا لمہ و باوہ غاک عطیہ تروک آتیکن دعا کیرہ و دا اللہ تعالیٰ نا رضانا دوئی کننگ نا ذریعہ مریک۔ وزیراعظم پارے کہ داوخت آ پاکستان تینا تاریخ نا مشکل انگا وخت آن گدرینگ انگ ءِ، نوکاپ نا بھسکاری مچ آ دنیا نا مون آٹے۔ وزیراعظم پارے کہ اودورہ ٹی جہانی راہشون تتون اوڑدہی کرینے و اوفتے پاکستان اٹی نوکاپ آن مروک آ بھسکاری و اونا نتیجہ ٹی پاکستان نا مالی و زرگزرانی مشکل آتیان معلومدار کرینے۔ وزیراعظم پارے کہ نن اللہ تعالیٰ آن دعا کین کہ ننا خواری ٹی برکت شاغے، ننا ویل آتے چٹفے، پاکستان ءِ اسہ عظیم شونہال و شون ہلوک ملک اس جوڑ کے و ننا مصیبت آتے چٹفے۔
