اسلام آباد۔ 21 ستمبر (اے پی پی) صدر مملکت ڈاکٹر عارف علوی علم انا مون آ دننگ و ورناتے پوسکن آ تعلیم و سائنس علم ءِ ہیل تننگ نا گرج آ زور شاغسا پارینے کہ دانا نتیجہ ٹی نئے بیرہ ملک ءِ شون ہلوک جوڑ کننگ اٹ کمک رسینگک بلکن تعلیم نا بشخ اٹی نمان گچینی بریک، شون ہلوک قومک تینا بولی آ گمر کیرہ، پاکستان نا آئین و سپریم کورٹ نا فیصلہ نا رداٹ تینا زبان ءِ سوگو تخوئی ءِ۔ داخیال آتا درشانی ءِ او چار شنبے نادے آ داڑے علامہ اقبال اوپن یونیورسٹی ٹی انگریزی زبان نا بابت مسہ دے ئی جہانی کانفرنس نا بنائی سیشن آن تران کرسا کرے ہرانا بست وبند ءِ یونیورسٹی امریکی سفارت خانہ نا شریداری اٹ کریسس۔ انگریزی زبان اٹ مون آ بروک آ رجحان نا بابت کانفرنس اٹی پاکستان اٹی امریکی سفیر ڈونلڈ بلوم، علامہ اقبال اوپن یونیورسٹی نا وائس چانسلر پروفیسر ڈاکٹر ضیاء القیوم، ملکی ودرملکی تعلیم نا چاہندار و یونیورسٹی نا چندی بشخ آتا سروک آک ہم بشخ ہلکر۔ صدر مملکت پارے کہ شون ہلوک قومک تینابولی آ گمرکیرہ، انگریزی بولی نا اسہ جہانی ءُ حیثیت اسے ولے اردو ننا قومی بولی ءِ، گڑاس بولی تا چٹنگ نا خطرہ ءِ ہرافتے معدوم مننگ آن بچفنگ کن کوشست کننگ نا گرج ءِ۔ صدر مملکت بولی و مواصلات نا اہمیت نا ذکر ءِ کرسا زور شاغا کہ تینا قومی زبان تیان بیدس ایلو بولی تیا ہم عبور دوئی کننگ المی ءِ۔
