اسلام آباد۔ 2 مئی (اے پی پی) یکجائی نپ ئُُ سیت ئِ کونسل ئَ ”کچھی کینال کیس“ ئَ لٹ ئُُ پلئَ ھوار بوھوکیں کارندہ آناں ٹوھیں ٹوھیں سزا ئُُ جزا دیگ بہ بیت ئُُ مزن وزیر محمد نواز شریف ئَ گوشت کہ گوستگیں زمانگ ئَ دیمروئی کار اِچبر گیشینتگیں وھد ئُُ پاس ئَ سرجم نہ بوتگ اَنتئُُ ھرچ ئُُ درچ ئِ تہ ئَ گیشی ھمروچگیں کار بوتگ ھمے ھاترا آیوکیں زمانگ ئَ توامیں منصوبگ آنی منظور بوتگیں ھرچ ئُُ درچ ئُُ وھد ئُُ پاس ئِ توک ئَ ساپ ئُُ سلہ ئی ئَ سرجم کنگ بہ بیت۔ یکجائی نپ ئُُ سیت ئِ کونسل (سی سی آئی ) ئِ دیوان مزن وزیر محمد نواز شریف ئِ پاگواجئی ئَ سئے شمبے ئَ اِدا برجم دارگ بوت ایشی ئِ تہ ئَ پنجاپ، سندھ، خیبر پختونخوا ئُُ بلوچستان ئِ وزیر آں بھر زُرت۔ سیکرٹری بین الصوبائی رابطہ ئَ دیوان ئَ را 16دسمبر 2016ئَ سی سی آئی ئِ گوستگیں دیوان ئَ بوتگیں پیسلہ آنی وڑ ئَ کنگ ئِ جاور ھال آنی بابت ئَ سرپدی دات۔ سی سی آئی ئَ ” کچھی کینال کیس“ ئَ لٹ ئُُ پُل ئِ بھتام آنی پٹ ئُُ پول ئِ سر ئَ چار ئُُ تپاس کنان ئَ یکجائی رنگ ئَ پیسلہ کُت کہ کیس ئِ تہ ئَ ھواریں کارندہ آنی ھلاپ ئَ بیم ناکیں سزا دیگ بہ بیت۔ مزن وزیر ئَ گوشت کہ گوستگیں دیمروئی ئِ منصوبگ اِچبر سرجم کنگ نہ بوتگ اَنت ئُُ ھرچ ئُُ درچ ئِ تہ ئَ ودگ بوتگ۔آئی ئَ ہدایت کُت کہ آیوکیں توامیں منصوبگ آنی سر ئَ منظور بوتگیں گیشینتگیں وھد ئُُ پاس ئِ تہ ئَ ساپ ئُُ سلہ ئی ئَ سرجم کنگ بہ بیت۔ سی سی آئی ئَ ہائر ایجوکیشن ئُُ 18ھژدھمی مٹ ئُُ بدلی ئَ پد ایندگر اے وڑیں ادارگ آنی بابت ئَ جیڈھ آناں پکوئیں رنگ ئَ گیوار کنگ ئِ ھاترا توامیں نمائندگ آناں بُنجاھی وزیر منصوبگ بندی ئُُ دیمروئی ئِ گوما میٹنگ کُت ئُُ پنت ئُُ شون دات۔
