اسلام آباد۔یکم مئی ( اے پی پی ) راجی اسمبلی ئِ اسپیکر سردار ایاز صادق ئَ پاکستان ئِ مزن گسی ڈل ءِ اوگانستانئِ ترءُ تابئِ سرئَ سدکّی ئِ درشانی کتگءُ گشتگ کہ پاکستان خطئِ تہا امنءُ ایمنی ئِ گیش کنگئِ واھشت مندا ِنت، اوگان قیادتئَ پاکستانئِ گوما سیادی ئَ را مھکم کنگئِ ھاترئَ گامیگج کنگئِ اوست داتگ، دوھیں ملک بے دروریں ءُ اثر مندیں سیادی ئِ واھشت مند اَنت، اوگان حکومت ءُ اُلس ئَ مزار شریف ئِ وئیل ئِ سرئَ پاکستانئِ صدر ئِ ایر جنگی کلوھئَ را ساڑاتگ، اوگانستان ئِ صدر اشرف غنی ءُ مزن گس باسک زوت پاکستانئِ ترءُ تابئَ کن اَنت۔ دوشمبے ئِ روچئَ بے نظیر میاں اوستمانی بالی پڑ ئِ سرئَ وطن واتری ئِ موھئَ ھال درئِ گوما گپءُ تران کنان ئَ آئی ئَ گشتگ کہ اے ترءُ تابئِ تہا پاکستان ئِ دراھیں سیاسی قیادتئَ پاکستان ءُ اوگانستان ئِ درنیامئَ جوانیں شریدار یئِ کلوھ داتگ ءُ پدر کتگ کہ اے وھد اِنت کہ مہ وت مہ وتئَ اوستءُ بھروسہئَ را گیش بہ کن اَنت۔ آئی ئَ گشتگ کہ پاکستان یک امنءُ ایمنیں ، وشھالیں ءُ دیمروئی کتگیں اوگانستانئِ واھشت مند اِنت، مہ اوگانستانئِ گوما سیادی ئَ را گیش کنگ لوٹ اَنت۔ اسپیکر ئَ گشتگ کہ پاکستان خطہ ئِ تہا امنءُ ایمنی ئِ گیش کنگئِ واھشت مند اِنت ءُ ایشی ئِ ھاترئَ مارا کوشست کنگ لوٹ ایت۔
