اسلام آباد۔ 28اپریل (اے پی پی) نیشنل ہیلتھ سروسز ریگولیشن اینڈ کوآرڈینیشن نا وزیر مملکت سائرہ افضل تارڑ پارینے کہ رکھی ٹیکہ ہر چنانا حق ئِ۔ حکومت غٹ چناتے رکھی ٹیکہ غاتے کن پرعزم ئِ و اسہ چناس ہم رکھی ٹیکہ غاتیان محروم سلپک۔ حکومت نا پورو کوشست ئِ کہ غٹ چناک جان لیوا ناجوڑی تیان رکھوک مریر ولے دا اسہ اسیجائی ئُ مشن اسے، ننا غٹ انا زمواری ئِ ۔ ہراڑکن ننے غٹ ئِ اواری اٹ کاریم کروئی مریک۔ مچ آ دنیاآنبار پاکستان اٹی ہم رکھی ٹیکہ غاتا اہمیت ئِ تالان کننگ کن ہفتہ امیونائزیشن اڈ تننگ انگ ئِ ۔ دا ہفتہ 24اپریل آن بناءکرینے و اپریل نا 30 تاریخ اسکان برجاسلک۔ رکھی ٹیکہ غاتا کمک اٹ دنیا ٹی لکھ آ زند آتے بچفنگانے و حفظان جان جوڑی نا بابت اسہ سرسہب و کم خڑچ وڑاسے۔ داہفتہ آ اڈتننگ نا مسخت چندی کمیونیٹیز، پارلیمنٹرین ، شریدار، کڑدہ، میڈیا و تعلقدار ادارہ غاتے امیو نائزیشن نا اہمیت آن معلومدار کننگ و پائیدار شونداری ہدف 2030 ءنا دوئی ٹی کڑد ادا کروئی ئِ۔ داکان مست 2016ءٹی ہم امیو نائزیشن نا بابت آگاہی فراوان کننگ کن مہم چلیفنگا۔ اینخو سال دانا سرحال ویکسین ورک تخنگانے۔ داوخت آ وزیر مملکت پارے کہ نن غٹ اسٹ مرینہ کاریم کینہ تو یقینا ننا دا مشن پورو مریک و ہر چنا رکھ مریک یعنی ننا اینو و پگہ جان جوڑ و رکھ مریک۔
