اسلام آباد۔ 19 جولائی (اے پی پی) بنجائی ویر ہاؤسنگ اینڈ ورکس مولانا عبدالواسع پارینے کہ ساڑی بنجائی حکومت الس نا ویل آتے ایسر کننگ کن سنجیدہ ءِ، جہانی منڈی ٹی پیٹرولیم مصنوعات آتا نہاد آتیٹی کمتی آن پد الس ءِ پین ریلیف فراوان کیک، الس تون کروک آ قول آتے پورو کننگک۔ بنجائی وزیر ہاؤسنگ اینڈ ورکس و جمعیت علمائے اسلام بلوچستان نا صوبائی امیر مولانا عبدالواسع چندی ڈل آتون اوڑدہی ٹی پارے کہ بدتمیزی، بدکلامی، دروغ و پھسات نا سیاست پی ٹی آئی نا ایجنڈا ءِ، عمران نیازی نا دور ہنان او اسُل وزیراعظم جوڑ مننگ کپک۔ مولانا عبدالواسع پارے کہ ملک انا بھسکاری نا زموار مسکوہی حکمران ءِ ہرا ملک انا زرگزرانی حالیت ءِ بھس کرے۔ بنجائی وزیر پارے کہ ضمنی گچین کاری تیٹی پی ٹی آئی ، پی ٹی آئی ءِ باترفے، مسکوہی ءِ ساڑی آ گوازگر آک شکست تسر، پی ٹی آئی 20 نشست آتیان پنچ باتس تو خوشی و مبارکباد انت ہیت اسے نا۔ اوپارے کہ جمعیت علمائے اسلام مدام آئین و کانود نا بالادستی کن جہد کرے انتئے کہ آئین آن بیدس باندات آک سہی مننگ کپسہ داڑکن ننا کوشست ءِ کہ غٹ تر باندات آتے آئین و کانود نا رداٹ چلیفن۔ اوپارے کہ پنجاب اٹی تحریک انصاف نا ضمنی گچین کاری تا سرسہبی آن ملکی باندات آتیا ہچ ءُ اثراس تمپک۔ اوپارے کہ ہرا نشست آتیا مسلم لیگ (ن) شکست کنگوسس دا 2018 ٹی پی ٹی آئی کٹاسس داسہ ضمنی گچین کاری تیٹی پی ٹی آئی ، پی ٹی آئی ءِ باترفے۔ بلوچستان نا بابت گپ وتران کرسا بنجائی وزیر پارے کہ بلوچستان نا غٹ زہمی علاقہ غاتے ریلیف فراوان کینہ اسہ ہم زہمی علاقہ اسے کمکی سرجزآتیان محروم کپنہ۔ اوپارے کہ عمران نیازی ضمنی گچین کاری تا گچین کاری نتیجہ غاتے امنا کرینے اومیت ءِ کہ الیکشن کمیشن نا ممنوعہ فارن فنڈنگ نا فیصلہ ءِ ہم امنا کینہ۔
