اسلام آباد۔ 25اپریل (اے پی پی) صدر مملکت ممنون حسین پارینے کہ پاکستان درملکی براہ راست زرکاری کن گچین آسراتی فراوان کیک۔ پیشن نا ملک پاکستان نا گچین تشخص ئِ تالان کننگے۔ اوداہیت ئِ سے شنبے نا دے داڑے ایوان صدر اٹی ڈنمارک کن پاکستان نا پندار سفیر سید ذوالفقار حیدر گردیزی تون اوڑدہی ٹی پارے۔ صدر پارے کہ ڈنمارک اٹی واپاری برادری ئِ پاکستان اٹی خاص کر متبادل توانائی نا بشخ اٹی زرکاری نا وارخواہی تیان معلومدار کننگے۔ سفیر ئِ اونا پوسکن آ زمواری تیا مبارکبادی ترسا صدر پارے کہ دُن تو پاکستان و ڈنمارک نا نیام اٹ ہڑتوم آ کنڈآتا واپاری کچ اٹی ودکی مننگ ئِ ولے ڈنمارک اکن روایتی و غیر روایتی گڑاتیٹی ننا برآمد آتے پین ودفنگ نا گرج ئِ ۔ صدر اومیت ظاہر کرے کہ پوسکن آ پندار سفیر نا تقرری آن ہڑتوم آ ملک آتا نیام اٹ غٹ بشخ آتیٹی تعلقداریک پین سوگو مریرہ۔ اوپارے کہ پاکستان و ڈنمارک نا نیام اٹ پرتپاک و خوشگوار تعلقداریک ئُ و ہڑتوم آ ملک آک چندی جہانی ادارہ غاتیٹی اسہ ایلو تون کمک کیرہ۔ اوپندار سفیر تون پارے کہ او سال 2018-20 ءکن انسانی حق انا کونسل اٹی پاکستان نا اومیت دار نا مخ تفی دوئی کننگ نا کوشست ئِ کے۔ اوپارے کہ پارلیمنٹرینز و تھنک ٹینک ہر حکومت نا پالیسی تا تیاری ٹی اہم کڑد ادا کیک۔ صدر پوسکن آ سفیر نا زمواری تا ادائیگی کن تینا نیک است خواہی نا درشانی ئِ کرے و پارے کہ او ڈنمارک نا ملکہ مارگریٹ دوئم کن اونا نیک است خواہی تے سرکے۔
