اسلام آباد۔ 25اپریل (اے پی پی) صدر مملکت ممنون حسین صنعت و ٹیکنالوجی نا بشخ آتیٹی پاکستان ئِ پولینڈ نا مہارت آن فائدہ ہرفنگ آ زور شاغانے و پارینے کہ پولینڈ نا زرکارآک کشت و کشار، فوڈ پروسیسنگ ، کولا، توانائی و دفاع نا بشخ آتیٹی پاکستان اٹی زرکاری کیر۔ اوداخیال آتا درشانی ئِ سے شنبے نا دے داڑے ایوان صدر اٹی پولینڈ کن پاکستان نا پندار سفیر شفقت علی خان تون اوڑدہی ٹی ہیت وگپ کرسا کرے۔ پندار سفیر ئِ اونا پوسکن آ زمواری تیا مبارکبادی ترسا صدر پارے کہ او ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو جوڑ کننگ کن تینا گچین لائخی تے کاریم اٹ اتیر۔ اوپارے کہ پاکستان پولینڈ ئِ یورپ اٹی اسہ بے کچ اہم ئُ ملک اس تکک و ہڑتوم آ ملک آتے سیاسی ،معاشی و دفاعی بشخ اٹی بڑزکہولی بایدے ہیت وگپ کروئی مرے۔ اوپندار سفیر تون پارے کہ او ہڑتوم آ ملک آتا نیام اٹ مست آن ساڑی معاہدہ غاتیا زوت عملدرآمد کن کاریم کیر۔ اوپارے کہ ہڑتوم آ ملک آتا نیام اٹ ہڑتوم آ کنڈآتا واپار اوفتا حقی لائخی آن کم ئِ ہراٹی ودکی نا گرج ئِ۔ صدر پارے کہ پولینڈ نا زرکارآک کشت وکشار ، فوڈ پروسیسنگ ، کولا ، توانائی و دفاع نا بشخ اٹی زرکاری نا گچین وارخواہی تیان فائدہ ہرفنگ کیرہ۔ صدر پندار سفیر نا پوسکن آ زمواری تا ادائیگی کن نیک است خواہی نا درشانی ئِ کرے۔
