اسلام آباد 25اپریل (اے پی پی) وزیر خزانہ سینیٹر اسحاق ڈار پارینے کہ پاکستان اٹی کاروباری آسانی ودی کننگانے و مائیکرو اکنامک سوگوی نا دوئی آن پد داسہ حکومت شرح نمو ٹی ترند تر و پائیدار شونداری نا دوئی کن کوشست کننگ ئِ۔ واشنگٹن اٹی یو ایس چیمبر آف کامرس اینڈ انڈسٹری ٹی امریکہ پاکستان بزنس کونسل نا باسک آتیان تران کرسا اوپارے کہ ساڑی حکومت معیشت نا غٹ بشخ آتیٹی شفافیت ئِ المی جوڑ کننگ کن پرعزم ئِ و دابابت حکومت کیہی جہانی ادارہ غاتون اواری اٹ کاریم کننگ ئِ۔ وزیر خزانہ پارے کہ شفافیت نا کمک اٹ گورننس نا گچینی و دہشت گردی نا برخلاف جنگ اتون اوار خراج اودیم کننگ نا چٹفنگ حکومت نا اولیت آتیٹی اوار ئِ۔ اسحاق ڈار دود انا ساڑی مروک آتے پارے کہ پاکستان نا جہانی ریٹنگ اٹی گدرینگوک آ چار سال اٹی نمان بدلی رونما مسنے و اونا ریٹنگ منفی آن مثبت کننگانے۔ اوپارے کہ ننا اسٹاک مارکیٹ دنیا نا گچین کارکڑد نا درشان کروک آ پنچ بھلا مارکیٹ آتیٹی اوار ئِ ہراڑآن داہیت ظاہر مریک کہ پاکستان اٹی زرکاری نا بھلو گمان اس ساڑی ئِ۔ اوپارے کہ پاکستان داوخت اسکان کاروباری آسراتی تا بابت 24جتا کانود درستی راستی کرفینے وخت اس کہ پین 10 کانود آ کاریم کننگ انگ ئِ۔ پاک امریکہ ہڑتوم آ کنڈآتا تعلقداری آ روشنی شاغسا اوپارے کہ ہڑتوم آ ملک آک واپار، کاروبار و راجی شونداری نا بشخ آتیٹی اواری اٹ کاریم کننگ ئُ۔ اوامریکی زرکارآتیا زورشاغا کہ او پاکستان اٹی زرکاری نا پرکشش وارخواہی تیان فائدہ ہرفر۔ اوپارے کہ جہانی کمپنی تے بایدے مرے کہ او پاکستان اٹی مینو فیکچرنگ نا بشخ اٹی زرکاری آ سجفر انتئے کہ پاکستان اٹی دنیا نا ایلو ملک آتا مقابلہ ٹی بھاز زیات ہڑزان افرادی قوت دستیاب ئِ و پاکستان ئِ کیہی علاقائی منڈی تسکان آسان رسینگ دوئی ئِ۔ اوپارے کہ داوخت پاکستان کم شرح سود آ کڑز آتا آسراتی تا فراوانی آ خصوصی توجوہ تننگ ئِ۔ وخت اس کہ ملک اٹی انفراسٹرکچر نا اڈتننگ آ ہم عملدرآمد جاری ئِ۔ اوپارے کہ آئی ایف سی اواری اٹ انفراسٹرکچر بینک انا اڈتننگ آن بنداوی ڈھانچہ نا شونداری ٹی کمک رسینگک۔ وزیر خزانہ مستی پارے کہ حکومت پاکستان ئِ مالیات و ڈیجیٹل نا بشخ آتیٹی شونداری کن پرعزم ئِ۔ دود اٹی جنرل انجینئرنگ ، بوئنگ ، لاک ہیڈ مارٹن ، پراکٹر اینڈ گیمبل ، مون سینٹو، ایکسن موبل ، موٹرولا، ابر، کوکاکولا تون اوار کیہی جہانی کمپنی تا نمائندہ غاک بھلو کچ اسے ٹی ساڑی ئسر و پاکستان نا اقتصادی شونداری و کاروباری بشخ اٹی آسراتی تا فراوانی نا بابت حکومت نا کوشست آتا ستائِ کریر۔
