اسلام آباد۔ 25اپریل (اے پی پی) وزیر خزانہ سینیٹر محمد اسحاق ڈار تون امریکہ نا قائم مقام ڈپٹی سیکرٹری آف سٹیٹ ٹام شینن اوڑدہی کرے۔ واشنگٹن ٹی پاکستانی سفارت خانہ ٹی مروک آ دا اوڑدہی جہانی بینک و آئی ایم ایف نا دیوان اٹی ساڑی مننگ نا وخت آ مس تانکہ امریکہ نا بڑزکو انتظامی عہدیدار آتون علاقائی ویل و ہڑتوم آ کنڈآتا تعلقداری تیٹی ودکی آ خیال آتا درشانی ئِ کننگ مرے۔ اسحاق ڈار امریکی کمامدار آتے پارے کہ پاکستان امریکہ تون مست آن ساڑی ہڑتوم آ کنڈآتا تعلقداری ٹی سوگوی و ودیکی خوائک تانکہ بروک آ وخت اٹی ہڑتوم آ ملک آتا تین پہ تینی است خواہی نا بشخ آتیٹی ہڑتوم آ کنڈآتا کمکاری ئِ پین ودفنگ مرے۔ اوپارے کہ پاکستان تین پہ تینی عزت و اسیجائی فائدہ غاتا رداٹ ٹرمپ انتظامیہ تون اواری اٹ کاریم کننگ خوائک۔ ملک آن دہشت گردی و انتہاءپسندی نا چٹفنگ کن حکومت نا پکا عزم انا اعادہ ئِ کرسا وزیر خزانہ قائم مقام ڈپٹی سیکرٹری ئِ پارے کہ حکومت مچ آ ملک اٹی دہشت گردی نا چٹفنگ کن کارروائی تا بنائِ کرینے و یخین ئِ کہ دا کارروائی تیٹی پاکستان آن دہشت گردی و انتہاپسندی نا چٹفنگ نا ذریعہ امن و ایمنی نا حالیت آتیٹی پین گچینی اتنگک۔ اوپارے کہ پاکستان نا الس تینا قومی فائدہ ٹی سیکورٹی ادارہ غاتون پبی کمک کننگ ئِ تانکہ ملک اٹی امن و ایمنی نا حالیت آتے پین گچین جوڑ کننگ مرے۔ اوپارے کہ دنیا ٹی ہچ ئُ دُن ئُ ملک اس اف ہرا دہشت گردی نا چٹفنگ کن پاکستان آنبار داخہ زیات انسانی جان تا قربانی تروئے۔ اوامریکی کمامدارآتے پارے کہ پاکستان نا اقتصادی حالیت آتیٹی گچینی، امن و ایمنی نا گچینی، حکومت نا دانشمندانہ و آزادانہ واپاری پالیسی تا عکاس ئِ۔ اوامریکی انتظامیہ ئِ باوری ترفے کہ ملک آن دہشت گردی و انتہاپسندی نا عنصر آتا چٹفنگ نا بابت ہچ وڑنا دباﺅ اسے سگنگ پننگک و دُن انگا عنصر آتا برخلاف ہچ ئُ رعایت اس کننگپک تانکہ نیشنل ایکشن پلان نا رداٹ شونہال و رکھوک پاکستان نا مسخت ئِ دوئی کننگ مرے۔ وزیر خزانہ امریکہ نا قومی سلامتی نا سلاہکار لیفٹیننٹ جنرل میک ماسٹر نا ساڑی آ دورہ پاکستان ئِ خوش آئند گوندسا پارے کہ داڑآن پاکستان تون اوار سویلی ایشیاءنا ڈیہہ ٹی امن نا اسیجائی مسخت آتا دوئی ٹی کمک رسینگک ۔ اوغانستان اٹی امن و ایمنی نا حالیت آتیا گڑتی نا درشانی ئِ کرسا اسحاق ڈار پارے کہ اوغان ویل انا پائیدار ایسر اوغانستان نا سیاسی سروک آتا صلابت و شرکت آن ہی المی جوڑ کننگ مریک۔ ٹام شینن ٹرمپ انتظامیہ نا کنڈآن پاکستان تون ہڑتوم آ کنڈآتا تعلقداری ٹی ودیکی نا چرجوئی ٹی پارے کہ امریکہ پاکستان تون اواری اٹ علاقائی و سویلی ایشیاءنا امن و ایمنی نا حالیت آتیٹی گچینی نا اسیجائی مسخت آتے دوئی کننگ خوائک۔
