سویلی ایشیاءٹی امن و کمکاری نا مون آ دننگ پاکستان نا است انا خواہش ئِ، سارک ئِ فعال علاقائی تنظیم نا وڑاٹ ہُننگ خوائک ، سارک چارٹرنا اصول و مسخت آتون وابستگی نا تہیہ کرینے
اسلام آباد۔ 25اپریل (اے پی پی) وزیراعظم محمد نواز شریف پارینے کہ سویلی ایشیاءٹی امن و کمکاری نا مون آ دننگ پاکستان نا است انا خواہش ئِ ہراڑکن سلامتی و سوگوی المیئِ۔ سے شنبے نا دے داڑے وزیراعظم ہاﺅس اٹی مالدیپ نا وزیر خارجہ ڈاکٹر محمد عاصم تون اوڑدہی ٹی ہیت وگپ کرسا وزیراعظم پارے کہ پاکستان سارک ئِ بھاز اہمیت ایتک و اودے فعال علاقائی تنظیم نا وڑاٹ ہُننگ خوائک۔ اوپارے کہ پاکستان سارک چارٹر نا اصول و مسخت آتون وابستگی نا تہیہ کرینے۔ وزیر اعظم پارے کہ پاکستان مالدیپ تون تعلقداری تے بھاز اہمیت ایتک۔ اوپارے کہ ہڑتوم آ ملک آک اسیجائی عقیدہ ، تین پہ تینی مفاہمت و شرف اٹی گنڈوک ئُ۔ اوپاکستان و مالدیپ نا نیام اٹ ہڑتوم آ کنڈآتا واپار اٹی ودکی کن کاریم کننگ آ زورشاغار ۔ وزیر اعظم پارے کہ داہیت است بڈ ئِ کہ پاکستان و مالدیپ نا نیام اٹ پارلیمانی کمکاری ٹی ودکی مسنے و مالدیپ نا سینیٹ نا چیئرمین نا گدرینگوک آ سال انا دورہ پاکستان سوگو پارلیمانی تعلقداری تا شاہدی ئِ۔ ڈاکٹر محمد عاصم ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو جوڑ کننگ نا اومیت نا درشانی ئِ کرینے۔ داوخت آ وزیراعظم نا سلاہکار خارجہ سرتاج عزیز و خصوصی کمکار طارق فاطمی ئسک ہم ساڑی ئسر۔
