راولپنڈی۔ 25اپریل (اے پی پی) کودک شاری، سلہہ بند فوج و کانود نافذ کروک آ ادارہ غاتیا جلہو آتون اوار دہشت گردی نا ایلو کارروائی تیٹی اوار پین چار ڈوہدار دہشت گرد آتے خیبر پختونخوا نا جیل اٹی پاہو تننگانے۔ دا دہشت گرد آتے فوجی عدالت آک غٹ دوبہ غاتا ثابت مننگ آ سزائے موت بنفیسس۔ پاک فوج انا شعبہ تعلقات عامہ (آئی ایس پی آر) نا جاری کروک سرجم احوال آتا رداٹ مشتاق خان ولد عمر سلیم، تحریک طالبان پاکستان نا متحرک باسک اس ئس دا کانود نافذ کروک آ ادارہ غاتیا جلہو آتیٹی اوار ئس ہراٹی افسر و ورناتتون اوار چندی بندغ آک تپاخت و ٹھپی مسوسر ۔ فوجی عدالت و مجسٹریٹ نا مون آ ڈوہ ئِ امنا کننگ آ اودے سزائے موت بنفنگاسس۔ عبدالرحمان ولد فضل ہادی تحریک طالبان پاکستان نا متحرک باسک اس ئس۔ دا کودک شاری تا خون ئِ کننگ اٹی اوار ئس، مجسٹریٹ نا مون آ دہشت گردی نا غٹ کارروائی تے امنا کننگ آ اودے سزائے موت بنفنگاسس۔ رحمان الدین ولد معمبر تحریک طالبان پاکستان نا متحرک باسک اس ئس دا سلہہ بند فوج و کانود نافذ کروک آ ادارہ و باسک آتیا جلہو آتیٹی اوار ئس۔ فوجی عدالت و مجسٹریٹ نا مون آ دہشت گردی نا غٹ کارروائی تے امنا کننگ آ سزائے موت بنفنگاسس۔ ظفر اقبال ولد محمد خان تحریک طالبان پاکستان نا متحرک باسک اس ئس دا کانود نافذ کروک آ ادارہ غاتیا جلہو آتیٹی اوار ئس۔ ہراٹی جونیئر کمشنر آفیسر تون اوار ایلو بندغ آتا تپاخت و ٹھپی و ایف سی کارندہ و اے ایس آئی بھاز ٹھپی مسوسر فوجی عدالت و مجسٹریٹ نا مون آ دہشت گردی نا غٹ کارروائی تے امنا کننگ آ اودے سزائے موت بنفنگاسس۔
