انتہاپسندی تون مون تننگ کن سیاسی، راجی و معاشرتی الم آتا مطالعہ المی ئِ دا مسخت کن علمی وتہذیبی کہول آ تحریک چلیفنگ نا گرج ئِ تانکہ قومی کہول آعلمی وادبی چاگڑد ناترویج ئِ کننگ مرے
اسلام آباد۔ 22اپریل (اے پی پی) صدر مملکت ممنون حسین پارینے کہ انتہاپسندی تون مون تننگ کن سیاسی، راجی و معاشرتی الم تا زیات مطالعہ المی ئِ۔ دامسخت کن علمی و تہذیبی کہول آ تحریک چلیفنگ نا گرج ئِ تانکہ قومی کہول آ علمی و ادبی چاگڑد نا ترویج ئِ کننگ مرے۔ صدر مملکت داہیت ئِ قومی کتاب میلہ نا بنائِ کننگ آن پد اسہ خصوصی دود اسے آن تران کرسا پارے۔ داوخت آ صدر مملکت کتاب بیرک اس ہم چست کرے۔ ہندی اسکول آتا طالب علم آک کتاب ناقومی نغمہ کتاب آتا دنیا سلامت مرے پیش کریر۔ داوخت آ کتاب پریڈ ہم مس ہرانا ساڑی مروک آک صدر مملکت ئِ سلامی تسر۔ صدر مملکت کتاب میلہ نا بنائِ کننگ آن پد چندی اسٹال آتیا ہنا و چندی سرحال آتا کتاب آتیٹی است خواہی نا درشانی ئِ کرے۔ صدر مملکت پارے کہ انتہاپسندی تون مون تننگ کن قوم انا غٹ تپہ غاتے اواری اٹ کاریم کروئی مریک انتئے کہ تنیا کروک آ کوشست آتیان ننا گرج آتا پوروی پورووڑاٹ مننگ کپک۔ صدر مملکت پارے کہ کتاب انسان نا ناطہ تخریب پرغنگسا جوڑ جاڑ تون گنڈنگک و کتاب مایوسی نا تہاری تے اومیت نا روشنی ٹی بدلیفک۔ ہنداخاطران پاکستانی قوم اتون اوار مچ آ عالم انسانیت کن کنا دا کلہو ئِ کہ او بے یخینی آن ناطہ ئِ پرغسا کتاب تون رشتہ ئِ گنڈر تو دا دنیا جنت نا نمونہ اس جوڑ مریک۔ صدر مملکت قومی کتاب میلہ ٹی چناتے کن خصوصی گوشہ کڈز ری پبلک ناستائِ کرسا پارے کہ چناتا رشتہ ئِ کتاب آتون گنڈسا آخبت ئِ رکھوک جوڑ کننگ مریک۔
