اسلام آباد۔ 08 اپریل (اے پی پی) پاکستان و جرمنی نا نیام اٹ ہڑتوم آ کنڈآتا واپار نا کچ اٹی برجامالی سال انا اولیکو 8 تُو اٹی تدوک آ مالی سال انا ہندا مد انا مقابلہ ٹی نمان ودکی ریکارڈ کننگانے، برجامالی سال اٹی جرمنی ءِ پاکستان نا برآمد آتیٹی 14.35 درسد و جرمنی آن درآمد آتیٹی 20.27 درسد نا نمو ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ برجامالی سال انا اولیکو 8 تُو اٹی جرمنی ءِ پاکستان نا برآمد آتا کچ 1.131 ملین ڈالر ریکارڈ کننگا ہرا تدوک آ مالی سال انا ہند امد انا مقابلہ ٹی 14.35 درسد زیات ءُ، تدوک آ مالی سال انا ہند امد اٹی جرمنی ءِ برآمد آتیان ملک ءِ 989.87 ملین ڈالر نا زرمبادلہ دوئی مسوسس۔ فروری ٹی جرمنی ءِ پاکستانی برآمد آتا کچ 139.73ملین ڈالر ئسک ہرا تدوک آ سال فروری ٹی 116.61 ملین ڈالر ئسر۔ مالی سال 2021ٹی جرمنی ءِ برآمد آتیان ملک ءِ 1.511 ارب ڈالر نا زرمبادلہ دوئی مسوسس۔ اسٹیٹ بینک انا رداٹ برجامالی سال انا اولیکو 8 تُو اٹی جرمنی آن درآمد آتیٹی تدوک آ مالی سال نا ہندا مد انا مقابلہ ٹی 20.27 درسد نا نمو ریکارڈ کننگانے۔ حساب وکتاب نا رداٹ جولائی آن ہلیس فروری اسکان نا مداٹی جرمنی آن درآمد آتیا 837.19 ملین ڈالر نا زرمبادلہ دوئی مس ہرا تدوک آ مالی سال انا ہندا مد اٹی 696.06 ملین ڈالر ئسر، فروری ٹی جرمنی آن 100.39 ملین ڈالر نا زرمبادلہ دوئی مسوسس ہر اتدوک آ سال فروری ٹی 90.09 ملین ڈالر ئسر، مالی سال 2021 اٹی جرمنی آن درآمد آتا کچ 1.148 ارب ڈالر ریکارڈ کننگاسس۔
