اسلام آباد۔ 06 اپریل (اے پی پی) اسلامی کمکار تنظیم (او آئی سی ) ، ایران و امریکی ناظم ایان میک کیری اوغانستان اٹی منشیات نا دسنگ آ پابندی نا اوغان حکومت نا فیصلہ نا ستاءِ کرینے۔ اوغان میڈیا نا رداٹ اسلامی کمکار تنظیم نا سیکرٹری جنرل حسین براہم طحہٰ اوغانستان نا کنڈآن ملک اٹی منشیات آ پابندی نا فیصلہ نا ستاءِ کرسا پارے کہ گیگ بدل فصل آتا دسنگ و منشیات نا عادی بندغ آتا بحالی نا پروگرامک اوغانستان کن جہانی برادری نا امداد نا بایدے بشخ مریر۔ امریکی ناظم الامور ایان میک کیری تینا اسہ ٹویٹ اسے ٹی پارے کہ اوغانستان اٹی منشیات نا دسنگ آ پابندی جوان ءُ گام اسے ولے دا پابندی آ عملدرآمد اہم مریک۔ اوپارے کہ جان جوڑ و کانودی کشارگر بشخ اوغانستان نا زرگزران و اوغان الس نا زرگزرانی حالیت آتیٹی گچینی ٹی کمک ایتک۔ ایران نا عہدیدارآک پاریر کہ ایران اوغانستان اٹی کوکنار نا دسنگ و منشیات نا پیدوار اٹی کمتی نا ستاءِ کیک۔ ایلو کنڈآ اوغانستان نانائب ترجمان بلال کریمی پارے کہ حکومت بزغرآتے گیگ بدل دسنگ فراوان کننگ و ڈٹ آتا بناکن ملازمت آتا وارخواہی فراوان کننگ نا کوشست کیک ۔
