اسلام آباد۔ 06 اپریل (اے پی پی) ایوانِ صدر نا کنڈآن الیکشن کمیشن آف پاکستان ءِ لس گچین کاری تا اڈتننگ نا بابت چٹھی اس مون تننگانے۔ چارشنبے نادے آ ایوان صدر نا پریس ونگ آن جاری بیان نا رداٹ چٹھی ٹی الیکشن کمیشن ءِ قومی اسمبلی نا پِننگ نا 90 دے انا تہہ ٹی گچین کاری کرفنگ کن تاریخ اس تننگ نا پاننگانے۔ آئین نا آرٹیکل (A)5 48و آرٹیکل (2) 224نا رداٹ صدر مملکت لس گچین کاری تا کرفنگ نا تاریخ اس مقررکیک۔ چٹھی ٹی پاننگانے کہ قومی اسمبلی نا گچین کاری تیکن اسمبلی نا پِننگ نا 90 دے انا تہہ ٹی گچین کاری کرفوئی مریک۔ لس گچین کاری تا تاریخ نا پڑو کن الیکشن ایکٹ، 2017 ء نا رداٹ الیکشن کمیشن تون سلابت المی ءِ۔
