محتسب محکمہ غاتا بد انتظامی نا برخلاف غاوتا دمدستی ازالہ کن پوسکن آ ئی ٹی ذریعہ ءِ کاریم اٹ اتے، صدر مملکت ڈاکٹر عارف علوی

اسلام آباد۔ 05 اپریل (اےپی پی) صدر مملکت ڈاکٹر عارف علوی لس بندغ ءِ دمدستی و مفت انصاف فراوان کننگ نا گرج آ زور شاغسا پارینے کہ محتسب محکمہ غاتا بدانتظامی نا برخلاف غاوتا دمدستی ازالہ کن پوسکن آ آئی ٹی ذریعہ ءِ کاریم اٹ اتے، فضول کانودی چارہ جوئی نا حوصلہ شکنی ءِ کننگے، داڑآن محکمہ و بنجائی محتسب آ بھاریم ودک۔ سے شنبے نادے آ ایوان صدرنا پریس ونگ آن جاری بیان نا رداٹ صدر مملکت ڈاکٹر عارف علوی تون بنجائی محتسب اعجاز احمد قریشی اوڑدہی کرے۔ اوڑدہی ٹی بنجائی محتسب صدر مملکت ءِ سال 2021اٹی ادارہ نا کارکڑد و سرسہبی تا بارواٹ حوال تس۔ تدوک آ سال بنجائی محتسب ءِ 110،398 غاو دوئی مس۔ کل غاوتیان 106،732 ایسر کننگا، محتسب نا 92.7 درسد فیصلہ غاتیان عملدرآمد کننگا۔ حوال اٹی پارے کہ کل غاوتیان 42،000 آن لائن دوئی مس و اوفتیا کارروائی کننگا۔ صدر مملکت  ءِ ملک انا چندی علاقہ غاتیٹی غاو سیل، علاقائی دفتر آتا جوڑ کننگ آ ہم حوال تننگا۔ غاوتا ازالہ نا جامع سسٹم نا رداٹ بنجائی حکومت نا 180 چندی ایجنسی تے مربوط کننگا۔ داوخت آ صدر مملکت پارے کہ بنجائی محتسب ملک انا مر مر انگا علاقہ غاتسکان تینا رسینگ ءِ ودفے۔ محتسب محکمہ غاتا بدانتظامی نا برخلاف غاوتا دمدستی ازالہ کن پوسکن آ آئی ٹی ٹول ءِ کاریم اٹ اتے۔ بنجائی محتسب یوٹیلیٹی کمپنی تا نا انصافی نا برخلاف غاوتروک آتے زوت انصاف فراوان کے۔ اوپارے کہ بنجائی محتسب تون زیات تر غاو گیس و بجلی نا بشخوک آ کمپنی تا کنڈآن زیات بلنگ نا بابت ءُ۔ بنجائی محتسب میڈیا نا کمک اٹ تینا کڑد و خذمت آتا بارواٹی آگاہی ودی کے۔ بنجائی محتسب غاوتا زوت ازالہ کن چندی سرکاری محکمہ غاتون رابطہ جوڑ کے۔ محتسب مخلوق نا غاوتے ترندی اٹ سرتننگ کن سرکاری ادارہ غاتون کمکاری ءِ ودفے۔ فضول کانودی چارہ جوئی نا حوصلہ شکنی ءِ کننگے، داڑآن محکمہ و بنجائی محتسب آ بھاریم ودک۔ صدر مملکت محتسب نا کارکڑد و رسینگ  ءِ ودفنگ نا سرجزآتا ستاءِ کرے۔ صدر مملکت نا ادارہ ءِ سوگو کننگ ، دمدستی انصاف نا فراوانی ٹی کمکاری نا باور کرفے۔