پاور پلانٹ ایل این جی آن 1180 میگاواٹ بجلی ودی کننگ نا ڈٹ ئِ، بھکھی پاور پلانٹ ہژدہ تُو انا چنکو وخت اسے ٹی پورو کننگا، ڈٹ آن دمدستی وڑاٹ 717 میگاواٹ بجلی نیشنل گریڈ اٹی اوار مریک
18 تُو انا مد اٹی گیس پاور پلانٹ نا پوروی اسہ ریکارڈ اسے ، شفاف بولی نا بناءآ حکومت 50 ارب روپئی نا بھلو پیسہ اس بچفے، وزیراعظم محمد نواز شریف
بھکھی/شیخوپورہ۔ 19 اپریل (اے پی پی) وزیراعظم محمد نواز شریف چارشنبے نا دے داڑے بھکھی پاور پلانٹ نا بنائِ کرے۔ دود اٹی گورنر پنجاب محمد رفیق رجوانہ، وزیراعلیٰ شہباز شریف، بنجائی وزیر دیر و بجلی خواجہ آصف، بنجائی وزیر پٹرولیم و قدرتی وسیلہ شاہد خاقان عباسی و ایلو بڑزکو کمامدارآک ساڑی ئسر۔ وزیراعظم ئِ ڈٹ انا بارواٹی بریفنگ تننگا۔ اوپلانٹ نا کنٹرول روم انا دورہ ئِ کرے ہراڑے اودے دا چاگڑد دوست ڈٹ انا کاریم نا کچ انا بارواٹی معلومدار کننگا۔ بھکھی پاور پلانٹ حکومت پنجاب نا اسہ کلیدی ئُ ڈٹ اسے ہرا ایل این جی آن 1180 میگاواٹ بجلی ودی کننگ نا حامل ئِ۔ شیخو پورہ نا خڑک بھکھی پاورپلانٹ ہژدہ تُو انا چنکو وخت اسے ٹی پورو کننگانے۔ وزیراعظم آفس نا کنڈآن جاری کروک بیان نا رداٹ داخہ کم وخت اٹی ڈٹ انا پوروی جہانی ریکارڈ اسے ۔ ڈٹ آن دمدستی وڑاٹ 717 میگاواٹ بجلی نیشنل گریڈ اٹی اوار مریک۔ بھکی پاور پلانٹ آن دوئی مروک آ بجلی ہفت روپئی سی ئُ ہفت پیسہ فی یونٹ ملک۔ ڈٹ اٹی شفافیت آن 50 ارب روپئی نا بچت مسنے۔ بھکھی پاور پلانٹ کم انگا نرخ اٹی تیار کروک آ گچین کارکڑد نا ڈٹ ئِ۔ پلانٹ گیس زیان کننگ آن بیدس چاگڑد دوست بجلی ودی کننگ نا لائخی تخک۔ بھکھی پاور پلانٹ حکومت نا اولیتی ڈٹ آتیٹی اوار ئِ۔ پاور پلانٹ آن ملک اٹی بجلی نا کمتی نا مون ئِ توننگ اٹی کمک رسینگک۔ وزیراعظم محمد نواز شریف 18 تُو انا مد اٹی گیس پاور پلانٹ نا پوروی ئِ اسہ ریکارڈ اس گوندسا پارینے کہ شفاف بولی نا بناءآ حکومت 50 ارب روپئی نا بھلو پیسہ اس بچفے۔ اودے پاننگانے کہ دا ڈٹ ملک انا ایلو بجلی ودی کروک آ ڈٹ آتا نسبت 61.59 درسد نا ریکارڈ کاریم نا کچ انا حامل مریک۔ وزیراعظم داکان مست ڈٹ آ پیش رفت نا جاچ ئِ ہلنگ کن داسال فروری ٹی داجاگہ نا دورہ ئِ کریسس۔
