اسلام آباد۔ 05 اپریل (اے پی پی) پاکستان و اٹلی نا نیام اٹ ہڑتوم آ کنڈآتا واپار نا کچ اٹی برجامالی سال اٹی نمان ودکی مسنے ، مالی سال انا اولیکو 8 تُو اٹی اٹلی ءِ پاکستان نا برآمد آتیٹی 34.69 درسد وخت اس کہ درآمد آتیٹی 53.71 درسد نا نمو ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ برجامالی سال انا اولیکو 8 تُو اٹی ءِ برآمد آتیان ملک ءِ 651.69 ملین ڈالر نا زرمبادلہ دوئی مس ہرا تدوک آ مالی سال انا ہندا مد انا مقابلہ ٹی 34.69 درسد زیات ءُ، تدوک آ مالی سال انا ہند امد اٹی اٹلی ءِ برآمد آتیان ملک ءِ 483.83 ملین ڈالر نا زرمبادلہ دوئی مسوسس۔ فروری 2022 اٹی اٹلی ءِ برآمد آتیان ملک ءِ 81.82 ملین ڈالر نا زرمبادلہ دوئی مس ہرا تدوک آ سال فروری ٹی 68.82 ملین ڈالر ئسر۔ مالی سال 2021اٹی اٹلی ءِ پاکستانی برآمد آتا کچ 773.61 ملین ڈالر ریکارڈ کننگاسس۔ اسٹیٹ بینک انا رداٹ برجامالی سال انا اولیکو 8 تُو اٹی اٹلی آن درآمد آتیٹی تدوک آ مالی سال انا ہندا مد انا مقابلہ ٹی 53.71 درسد نا نمو ریکارڈ کننگانے۔ جولائی آن ہلیس فروری 2022 اسکان نا مد اٹی اٹلی آن درآمد آتا کچ 534.57 ملین ڈالر ریکارڈ کننگا ہرا تدوک آ مالی سال انا ہندا مد اٹی 347.77 ملین ڈالر ئسر۔ فروری ٹی اٹلی آن درآمد آتیا 58.32 ملین ڈالر نا زرمبادلہ خڑچ مس ہرا تدوک آ سال فروری ٹی 41.46 ملین ڈالر ئسر۔ مالی سال 2022 اٹی اٹلی آن درآمد آتا کچ 568 ملین ڈالر ریکارڈ کننگاسس۔
