اسلام آباد۔ 04 اپریل (اے پی پی) صدر مملکت ڈاکٹر عارف علوی 3 اپریل آ قومی اسمبلی نا پِننگ نا رداٹ آئین نا آرٹیکل (1)224اے انا رداٹ نگراں وزیراعظم نا تقرری کن جوان ءُ بندغ اس سلاہ کننگ کن وزیراعظم عمران احمدخان نیازی و دزکش مروک آ قومی اسمبلی ٹی قائد حزب اختلاف میاں محمد شہباز شریف ءِ چٹھی اس نوشتہ کرینے۔ دوشنبے نادے آ ایوان صدر نا پریس ونگ آن جاری بیان نا رداٹ صدر مملکت تینا چٹھی ٹی ہڑتوم آ راہشون تے معلومدار کرے کہ اگہ قومی اسمبلی نا پِننگ نا مسہ دے انا تہہ ٹی وزیراعظم و دزکش مروک آ قومی اسمبلی ٹی قائد حزب اختلاف کس اسے نگران وزیراعظم جوڑ کننگ آ امنا کپس تو اِرا، اِرا پن اسپیکر قومی اسمبلی نا ٹہیفوک آ کمیٹی ءِ گدریفوئی مریک ہرانا تشکیل ءِ اسپیکر قومی اسمبلی دمدستی وڑاٹ کیک، اسپیکر نا ٹہیفوک آ کمیٹی نا کل ہشت باسک مریرہ ہرا دزکش مروک آ قومی اسمبلی یا سینیٹ یا ہڑتوم آ باسک آتیا تالان مریرہ، کمیٹی ٹی حکومت و اپوزیشن ءِ اسہ وڑ نمائندگی دوئی مریک۔ چٹھی نا رداٹ آئین نا آرٹیکل (1)224اے انا رداٹ کمیٹی نا باسک آتا پنداری ءِ وزیراعظم و قائد حزب اختلاف کیرہ۔ صدر ڈاکٹرعارف علوی تینا چٹھی ٹی مستی نوشتہ کرینے کہ وزیراعظم عمران احمد خان نیازی آئین نا آرٹیکل (4)224اے انا رداٹ نگراں وزیراعظم نا تقرری اسکان وزارت عظمیٰ نا عہدہ غا فائزسلک۔ داہیت ذکر انا قابل ءِ کہ آئین پاکستان ناآرٹیکل (1)224اے صدر مملکت ءِ وزیراعظم و قائد حزب اختلاف نا سلابت اٹ نگران وزیراعظم نا تقرری نا اختیار ایتک۔
