اسلام آباد۔ 04 اپریل (اے پی پی) پاکستان تحریک انصاف نا راہشون چوہدری فواد حسین پارینے کہ ن لیگ نا اکاؤنٹ آتیان سپریم کورٹ نا بینچ آ پدریسہ تنقیدی جلہو مننگ ءِ ، اپوزیشن سپریم کورٹ آ اثرانداز مننگ نا کوشست کرے، عمران خان اگہ اپوزیشن نا برخلاف برانز ناکال تس تو اوفتے تینااُراٹی رہینگ انگ مشکل مریک ، پاکستان نا مفاد داٹی ءِ کہ سپریم کورٹ نا فیصلہ نا شرف ءِ کننگے۔ داخیال آتا درشانی ءِ او دوشنبے نادے آ داڑے میڈیا تون گپ و تران کرسا کرے۔ چوہدری فواد حسین پارے کہ اپوزیشن پاریکہ کہ شہزاد اکبر ملک ءِ اِلانے، شہزاد اکبر اینو ہم ننتون سلوک ءِ۔ اوپارے کہ اپوزیشن آئین ءِ لتاڑنگ کن اسہ کسر اسے ہم اِلیتنے، 22 مخلوق ءِ ہارس ٹریڈنگ نا کمک اٹ تینتون اوار کریر، انت دا آئین نا بشخ ئسک؟۔ چوہدری فواد حسین پارے کہ پاکستان نا الس گچین کاری تیکن تیار ءِ۔ اسہ ہم سیاسی جماعت اس گچین کاری تیان نرنگ نا کسر ءِ اختیار کپک ولے اپوزیشن نا جماعت آک الیکشن آن نرنگ نا کسر ءِ اختیار کننگ ءُ، اپوزیشن نا جماعت آک گچین کاری و الس آن انت اکن نرنگ ءُ؟۔ چوہدری فواد حسین پارے کہ سپریم کورٹ نا فیصلہ نا رداٹ نن مون آ کانہ ولے اگہ سپریم کورٹ آ اثرانداز مننگ نا کوشست کننگا تو نن مزاحمت کینہ۔ اوپارے کہ نن چٹھی نا سرجم آتے الس نا مون آ تختون ولے داڑآ نن پارلیمانی سیکورٹی کمیٹی نا دیوان ءِ بٹنگان و اپوزیشن راہشون تے داٹی بشخ ہلنگ کن سلہ خلکن ولے اوفک بشخ ہلتوس۔ اوپارے کہ نن پاکستان اٹی غداری نا سرٹیفکیٹ بشخنگ خواپنہ، داڑآ اخس کم ہیت مرے ہموخس جوان ءِ۔ چوہدری فواد حسین پارے کہ شہباز شریف اینوپارینے کہ او نگران سیٹ اپ کن پراسیس اٹی بشخ ہلپک ، نگران سیٹ اپ کن صدر نا کنڈآن نوشتہ کروک آ چٹھی آ نن تینا اِراپن ءِ گدریفینن ، شہباز شریف اگہ وزیراعظم کن پن تفک تو اوفتیان اسہ پن اس فائنل مریک۔
