اسلام آباد۔ 04 اپریل (اے پی پی) پاکستان و برطانیہ نا نیام اٹ ہڑتوم آ کنڈآتا واپار نا کچ اٹی برجا مالی سال انا اولیکو 8 تُو اٹی تدوک آ مالی سال انا ہندا مد انا مقابلہ ٹی نمان ودکی ریکارڈ کننگانے ، مالی سال نا اولیکو 8 تُو اٹی برطانیہ ءِ پاکستان نا برآمد آتیٹی 12.52 درسد وخت اس کہ درآمد آتیٹی 27.7 درسد نا نمو ریکارڈ کننگانے۔ سٹیٹ بینک انا کنڈآن دا بابت جاری کروک حساب وکتاب نا رداٹ جولائی آن ہلیس فروری 2022 اسکان نا مد اٹی برطانیہ ءِ برآمد آتیان ملک ءِ 1.472 ارب ڈالر نا زرمبادلہ دوئی مس ہرا تدوک آ مالی سال انا ہندا مد اٹی برطانیہ ءِ برآمد آن ملک ءِ 1.308 ملین ڈالر نا زرمبادلہ دوئی مسوسس۔ فروری 2022اٹی برطانیہ ءِ پاکستانی برآمد آتا کچ 162.92 ملین ڈالر ریکارڈ کننگا ہرا تدوک آ سل فروری ٹی 173.36 ملین ڈالر ئسر، مالی سال 2021 اٹی برطانیہ ءِ برآمد آتیان ملک ءِ 2.047 ارب ڈالر نا زرمبادلہ دوئی مسوسس۔ اسٹیٹ بینک انا رداٹ مالی سال 2022 نا اولیکو 8 تُواٹی برطانیہ غان درآمد آتیٹی تدوک آ مالی سال انا ہندا مد انا مقابلہ ٹی 27.74درسد ودکی مسنے۔ جولائی آن ہلیس فروری اسکان نا مد اٹی بر طانیہ غان درآمد آتیا 648.40 ملین ڈالر نا زرمبادلہ خڑ چ مس ہرا تدوک آ مالی سال انا ہندا مد اٹی 507.59 ملین ڈالر ئسر، فروری ٹی برطانیہ غان 75.61 ملین ڈالر نا درآمد ریکارڈ کننگا ہرا تدوک آ سال فروری ٹی 59.95 ملین ڈالر ئسر ، مالی سال 2021اٹی برطانیہ غان درآمد آتیا کچ 780.08 ملین ڈالر ریکارڈ کننگاسس۔
