اسلام آباد۔ 04 اپریل (اے پی پی) جسٹس جاوید اقبال نا کماشی ٹی بے گواہ بندغ آتیکن جوڑ قومی کمیشن 31 مارچ 2022 اسکان 6275 کیس آتے سرتس۔ بے گواہ بندغ کمیشن نا سیکرٹری نا کنڈآن مارچ 2022 نا جاری کروک حوال نا رداٹ فروری 2022 اسکان کمیشن ءِ 8463 کیس ودئی مس وخت اس کہ مارچ 2022 اٹی 76 پوسکن ءُ کیس دوئی مس اوکان پد بے گواہ مروک آ بندغ آتا با بت کیس آتا جم کچ 8539 مس۔ ہرافتیان بے گواہ بندغ آتیکن جوڑ قومی کمیشن مارچ 2022 اٹی 61 کیس سرتس۔ داوخت آ کمیشن 31 مارچ 2022 اسکان 6275 بے گواہ بندغ آتا کیس سرتسنے و بے گواہ بندغ آتا کچ 2264 ءِ ہرافتا بحفاظت اُراتیا پدی بننگ ءِ پک کننگ کن بے گواہ بندغ آتیکن جوڑ قومی کمیشن نا کوشست برجاءِ۔ بے گواہ بندغ آتیکن جوڑ قومی کمیشن مارچ 2022 اٹی 614 سماعت کرے ہرافتیان بنجائی دارالحکومت اسلام آباد اٹی 204، کراچی ٹی 182 وخت اس کہ کوئٹہ ٹی 228 سماعت اوار ءُ۔ بے گواہ بندغ آتا قومی کمیشن 31 مارچ 2022 اسکان 6275 بے گواہ بندغ آتا کیس سرتننگ آن بیدس بے گواہ بندغ آتا بحفاظت اُراتیا پدی ہِننگ ءِ پک کننگ کن قومی کمیشن نا چیئرمین جسٹس جاوید اقبال و بے گواہ بندغ آتا قومی کمیشن نا ایلو شرفمند آ باسک آک نئے بیرہ بے گواہ بندغ نا خاہوت آتا موقف ءِ خف تورے بلکن اوفتا زوت آن زوت بازیابی کن کوشست ہم کرے ہراڑآ بے گواہ بندغ آتا خاہوت آک چیئرمین جسٹس جاوید اقبال و بے گواہ بندغ آتیکن جوڑ کمیشن نا ایلو شرفمند آ باسک آتا کوشست آتا ستاءِ کریر۔ بے گواہ بندغ آتا کمیشن نا چیئرمین نا حیثیت اٹ جسٹس جاوید اقبال تینا عہدہ نا تنخواہ ہلپک و نئے سرکاری وسیلہ غاتے کاریم اٹ اتیک بلکن بے گواہ بندغ آتا قومی کمیشن نا صدر نا حیثیت اٹ کاریم کننگ ءِ تینا فرض تکک۔
