اسلام آباد۔ 19اپریل (اے پی پی) ساڑی حکومت ملک اٹی چنا وزالبول ئِ جان جوڑ غذا نا فراوانی ئِ المی جوڑ کننگ کن ٹھوس گام گیج چست کرینے، جان جوڑ غذانا فراوانی کن صوبہ و شونداری شریدار، بنجائی وزارت و یو این نانیام اٹ رابطہ و اشتراک کار برجائِ۔ چارشنبے نا دے وزارت نا کمامدارآک ”اے پی پی“ ئِ پاریر کہ وزیر مملکت نیشنل ہیلتھ ریگولیشنز اینڈ کوآرڈیننس سائرہ افضل تارڑ غٹ تعلقدار ادارہ غاتے پارت کرینے کہ ننے تینا بروک آ نسل ئِ جان جوڑ جوڑ کننگ کن جان جوڑغذا نا کاریم اٹ اتنگ ئِ المی جوڑ کروئی مریک، غٹ شاری تے جان جوڑ غذا نا فراوانی حکومت و ریاست نازمواری ئِ و پارے کہ وزیراعظم نواز شریف نا سروکی ٹی حکومت دہ ٹکی ایجنڈا اس تیار کرسا غٹ صوبہ غاتون اوار ی اٹ ایکشن پلان اس تیار کرینے ہرانا رداٹ صوبہ غاتون تین پہ تینی صلابت اتون عملدرآمد کن کاریم کننگ ئِ۔ اوپارے کہ ملک اٹی جان جوڑ و معیار خور انا فراوانی کن غٹ سیاسی جماعت آتے ہم کڑد ادا کروئی مریک انتئے کہ غیر معیاری و جان جوڑ بخش غذا نا عدم دستیابی نا سوب پاکستان اٹی چندی ناجوڑیک ودی مننگ ئُ۔ اوپارے کہ بنجائی حکومت غذائیت و غذائی سوگوی نا غٹ پروگرام تیٹی صوبہ غاتا پبی کمک و مدد کننگ ئِ داسہ غٹ صوبہ غاتون تینا تینا منظور شدہ غذائی پروجیکٹ آک ئُ و مچ آ ملک اٹی غذائی کاختی نا ویل ئِ ایسر کننگ کن کاریم جاری ئِ۔ اوپارے کہ بدقسمتی اٹ ورنامسن تا غذائی گرج آتے نظر انداز کننگک اوفتا غذائی کاختی ئِ مر کننگ کن چکار نا سخت گرج ئِ انتئے کہ ہمو ورنامسن تے پگہ لمہ اس جوڑ مروئی ئِ۔ اوپارے کہ غذائی لوازمات کون آ آئرن ، فولک ایسڈ، وٹامنز اے بی(کمپلیکس) وغیرہ ، آیوڈین ، زنک وغیرہ غذائی سوگوی نا رکھ و ہڑزان انگا وڑئِ۔
