دنیا انسانی ہمدردی ء ُ انسانانی درنیام ءَ برابری ء ُ اخلاق ءِ سرءَ  استیں میاں اوستمانی نظام ءِ ودار ءَ کنگءَ اِنت، ملک مستر ڈاکٹر عارف علوی ءِ اسلام آباد  سکیورٹی ڈائیلاگ ءِ گوشتانک دیئوک ءُ باسکاں گوں گپ ء ُ تران

اسلام آباد۔2اپریل  (اے پی پی): ملک مستر  ڈاکٹر عارف علوی ءَ گشتگ کہ دنیا تکانسریں  جاورھالاں چہ گوازگ ءَ اِنت، ء ُ انسانی ہمدری ء ُ  انسانانی نیام ءَ  برابری ء ُ اخلاقیات ءِ سرءَ استیں عالمی  نظام ءِ ودار ءَ کنگ ءَ اِنت۔ ملک مستر ءَ اے گپ جامع سلامتی ء ُ میاں اوستمانی کمک ءِ نوک سر ٹھینگ ءِ سرحال ءِ سرءَ اسلام  آباد سکیورٹی ڈائیلاگ ءِ گوشتانک دیئوک ء ُ باسکاں گوں گپ ء ُ تران کنا ن ءَ کتگ۔ ملک مستر ءَ اے گپ ءِ سرءَ اپسوزءِ درشانی کتگ کہ انسانی  راج دپتر جنگ ء ُ جدل ،تباہی ء ُ بیرانی ءَ چہ پُر ایں۔ ملک مستر ءَ گشتگ کہ اے جست ہم پکر ءِ گپ اِنت کہ راجاں چہ راج  دپتر ءَاھیل نہ زُرتگ۔  ایشی ءَ ابید انوگیں دور ءِ جیڑہ ء ُ جنجالانی ہوالگءَ آئی ءَگشتگ کہ  درشانی ءِ ردیں کارمرزی، دروگیں حالانی وسیلگءَ ردیں معلوم داری ء ُ آیانی شنگ ءُ تالان بوہگ سرجمیں دنیاءِ ھاترءَ لھتیں نوکیں چیلنج اَنت۔ ملک مستر ءَ   دنیام ءِ راج دپتر ءَ مزنیں انسانی تباہی ءِ زکر تگ ء ُ گشتگ کہ منگولانی اُرش ، انگلستان ءُ فرانس ءِ نیام ءَ 100 سالی جنگ، اولی ء ُ دومی میاں اوستمانی جنگانی تہا بازیں انسانی جان زوال بوتگ اَنت کہ ایشیءَ پد میا ں اوستمانی راجاں باندات ءِ جنگاں چہ رکگ ءِ ھاترءَ بازیں رھبند دیما اؤرتگ۔  ملک مستر ءَ گشتگ کہ پاکستان ءَ 40 سالاں چہ وتی سرڈگارءِ سرءَ لکھاں اوگان لڑء ُ بار کنوکانی مہمان جہلی کتگ ۔ ایشی ءَ ابید ملک مستر ءَ بھارت ءِنیمگءَ چہ پاکستانی حدءُ سیمسراں میزائل کپگ ءِ وئیل ءَ را غیرزمہ واری ءِ درستاں چہ مستریں عمل لیک اِتگ ء ُ گشتگ کہ بھارت ءَ نریندر مودی ءِ ہند و راج دوستی ءِ بنیادءَ ہندوستانی چاگردءَ را مٹ کنگ بوہگءَ اِنت۔آئی ءَ گشتگ کہ بھارت ءَ یورینیم ءُ شپوکی ءِ بازیں وئیل بوگ اَنت بلے میاں اوستمانی رد عمل جتاہ بوتگ۔ ملک مسترءَ گیش گشتگ کہ نیزگاری ءِ تہا کمی، جانء ُ سلامتی ءُ وانگ زانگ ءِ سرءَ دلگوشی دیئگ ءِ ہوالگءَ عالمی کوشست  پیلو وہگءَ اَنت وہدے کہ مردمانی کٹ ء ُ کمائی گیش بوہگءَ اَنت۔