کوئٹہ۔ 01 اپریل (اے پی پی) صوبائی وزیر تعمیرات و مواصلات سردار عبدالرحمان کھیتران پارینے کہ وزیراعلیٰ بلوچستان میر عبدالقدوس بزنجو نا حکومت ءِ ہچ ءُ خطرہ اس اف، مسکوہی وزیراعلیٰ جام کمال خان ءِ میر عبدالقدوس بزنجو ءِ شوکاز نوٹس تننگ نا ہچ ءُ اختیار اس اف ، وزیراعلیٰ ءِ کانود و آئین موکل ایتک کہ او تینا کابینہ ٹی دیر اس ہرفک و دیر ءِ ہرفپک، بلوچستان عوامی پارٹی نا گچین کاری تے روچہ مبارک آن پد کرفنگک ہراڑتون گیشتری مریک او بی اے پی نا صدر مریک۔ داہیت ءِ او جمعہ نادے آ داڑے صحافی تتون گپ وتران کرسا پارے۔ سردار عبدالرحمان کھیتران پارے کہ صوبائی حکومت وزیراعلیٰ بلوچستان میر عبدالقدوس بزنجو نا کماشی ٹی الس نا ویل آتے ایسر کننگ کن غٹ دوئی وسیلہ غاتے کاریم اٹ اتنگ ءِ ریکوڈک معاہدہ غان بلوچستان اٹی شونداری نا پوسکن ءُ کسر ملنگک و روزگار نا پوسکن ءُ وارخواہی ودی مریک۔ اوپارے کہ میر عبدالقدوس بزنجو ءِ بلوچستان عوامی پارٹی نا گیشتر باسک آتا مخ تفی دوئی ءِ مسکوہی وزیراعلیٰ بلوچستان جام کمال خان تون اختیار اف کہ او وزیراعلیٰ بلوچستان ءِ شوکاز نوٹس ایتے۔ اوپارے کہ ہراتم جام کمال خان نا برخلاف تحریک بے پتی پیش کننگاکہ تو میر ظہور احمد بلیدی ءِ بلوچستان عوامی پارٹی نا قائم مقام صدر پندار کننگاسس اگہ او صدر نا عہدہ ءِ تخنگ خواپک تو پارٹی نا سینئر باسک آتا سلابت اٹ دا عہدہ ءِ پین اسٹ ءِ تننگ مریک بلوچستان عوامی پارٹی نا گچین کاری تے روچہ مبارک آن پد کرفنگک۔ اسہ سوج اسے نا ورندی ٹی سردار عبدالرحمان کھیتران پارے کہ وزیراعلیٰ بلوچستان میر عبدالقدوس بزنجو ءِ بلوچستان عوامی پارٹی تون اوار ایلو سیوتی جماعت آتا پورو مخ تفی دوئی ءِ و صوبائی حکومت سوگو ءِ اودے ہچ ءُ خطرہ اس اف صوبائی حکومت اپوزیشن جماعت آتے ہم اوار ہلسا ہِننگ ءِ۔ اسہ سوج اسے نا ورندی ٹی سردار عبدالرحمان کھیتران پارے کہ گڑاس بندغ ءِ نن نا تغ تیٹی ہم وزارت اعلیٰ نظر بریک کس اسے نا تغ خننگ آ تو پابندی خلنگ مفک۔
