اسلام آباد۔ 19 اپریل (اے پی پی) قومی سلامتی نا سلاہکار لیفٹیننٹ جنرل (ر) ناصر جنجوعہ تون یورپین پارلیمنٹ نا کمیٹی خارجہ امور نا ڈل ڈیوڈ میک الیسٹر نا سروکی ٹی داڑے اوڑدہی کرے، اوڑدہی ٹی ڈیہہ نا جغرافیائی سیاسی حالیت و پاکستان نا سیکورٹی نا بابت معاملہ غاتیا سجفنگا۔ قومی سلامتی نا سلاہکار لیفٹیننٹ جنرل (ر) ناصر جنجوعہ یورپی پارلیمانی ڈل انا پاکستان آ بننگ نا خیرمقدم ئِ کرسا پارے کہ پاکستان یورپی یونین تون تعلقداری تے بے کچ اہمیت ایتک۔ اوپاک یورپی یونین تعلقداری تا جم اٹنگا حالیت آتیا است جمی نا درشانی ئِ کرے و کمکاری کن پوسکن آ بشخ آتا کمک اٹ دا تعلقداری تے پین مون آ دننگ نا گرج آ زور شاغا۔ قومی سلامتی نا سلاہکار ملک انا جم اٹنگا سلامتی ناحالیت آتیٹی گچینی و آخبت نا ڈٹ آتا بارواٹی کمیٹی نا ڈل ئِ بریف کرے۔ داوخت آ پاکستان ئِ مون تروک چیلنج آتا ذکر ئِ کرسا اوآخبت اٹی پاکستان نا کنڈآن ڈیہہ و غٹ دنیا کن اقتصادی سوگوی و رابطہ غاتا گام گیج آتے تالان کرے۔ یورپین پارلیمنٹ نا ڈل دہشت گردی و انتہاپسندی نا برخلاف پاکستان ناکوشست آتا ستائِ کرے۔ ڈل امنا کرے کہ پاکستان اسہ زیبائُ ملک اسے و سیل وسوات نا بھاز انگا وارخواہیک داڑے اریر۔
