اسلام آباد۔ 01 اپریل (اے پی پی) چیئرمین سینیٹ محمد صادق سنجرانی تون ملائیشیا نا وزیر پلانٹیشن انڈسٹریز اینڈ کموڈیٹیز مس زورائیدہ بنت قمر الدین ڈل اتون اوار پارلیمنٹ ہاؤس اٹی اوڑدہی کرے و ہڑتوم آ کنڈآتا تعلقداری تتون اوار تین پہ تینی است خواہی نا امور آ سرجم گپ وتران کننگا۔ سینیٹ سیکرٹریٹ نا رداٹ چیئرمین سینیٹ پارے کہ پاکستان و ملائیشیا نا نیام اٹ دیرینہ تعلقداری ءِ ہرا وخت تدینگ تون اوار مون آ ہِننگ ءِ۔ ہڑتوم آ ملک آتا نیام اٹ ساڑی آ بڑزکو کہول ڈل آتا ہن و بر آن ہڑتوم آ کنڈآتا تعلقداری تے پین مون آ دننگ دوئی مسنے۔ پارلیمانی ڈل آتا ہن و بر آن ہڑتوم آ ملک آتا تعلقداری تے پین سوگوی ملک و ہڑتوم آ ملک آتا نیام اٹ واپاری کچ اٹی ودکی و زرگزران ءِ نمان مون آ دننگ دوئی مریک۔ چیئرمین سینیٹ پارے کہ پاکستان ملائیشیا تون دوستانہ تعلقداری و چندی بشخ آتیٹی تین پہ تینی شریداری ءِ بھاز اہمیت ایتک و ہڑتوم آ ملک آک جہانی فورم تیا مدام اسہ ایلو نا موقف نا پبی مخ تفی ءِ کرینو۔ اوپارے کہ تینا جغرافیائی اہمیت نا سوب آن پاکستان و ملائیشیا، تینا کیبی مارکیٹ آتسکان رسینگ نا آسراتی فراوان کرسا اسہ ایلو ءِ سٹریٹجک و اقتصادی فائدہ فراوان کننگ کیرہ۔ تعلیم، دفاعی مصنوعات ، واپار و زرکاری ، الیکٹرانکس و آئی ٹی انڈسٹری، حلال فوڈ، آئل اینڈ گیس، قابل تجدید توانائی، سیل و سوات نا بشخ آتیٹی ہڑتوم آ کنڈآتا کمکاری اسہ ایلو نا گرج آتے پورو کننگ و ہڑتوم آ ملک آتا تعلقداری تے پین سوگو کننگ نا کسر ءِ آوار کیک۔ پاکستان ‘‘آسیان’’ نا ڈائیلاگ پارٹنر مننگ کن ملائیشیا نا کنڈآن مخ تفی نا چاری ءِ۔ محمد صادق سنجرانی پارے کہ آئی پی یو ٹی پاکستان نا شمولیت و ‘‘آسیان بین الپارلیمانی اسمبلی’’ ٹی مبصر نا حیثیت ملنگ نا بابت ملائیشیا نا کمکاری و مخ تفی نا ستاءِ کینہ۔ پاکستان اٹ واپار و زرکاری نا مون آ دننگ نا بابت محمد صادق سنجرانی پارے کہ پاکستان اٹی ماہی گیری ، ٹیکسٹائل ، فارماسیوٹیکل ، ازباب جراحی، میوہ و سوزی، ڈیری مصنوعات آتا دوئی کننگ کن ملائیشیا، پاکستان آن دا گڑاتا درآمد آتے ودفسا فائدہ ہرفنگ کیک۔ اوپارے کہ گوادر آخبت خڑک اٹی دنیا نا گچین زرگزرانی حب جوڑ مریک و سی پیک راہداری ڈٹ آن دے ٹک نیامی ملک آتسکان رسینگ نا سوب آن واپار، زرکاری ءِ نمان مون آ دننگ دوئی مریک۔ ملائیشیا ہم دا موقع غان بایدے فائدہ ہرفے و پاکستان اٹ ساڑی زرکاری نا گیشتر وارخواہی تیان فائدہ ہرفے۔ چیئرمین سینیٹ پارے کہ پاکستان، سیل و سوات ءِ مون آ دننگ کن گچین گام گیج کننگ ءِ و پاکستان سیل و سوات اٹی ملائیشیا نا مہارت آن فائدہ ہرفنگ تون اوار اوار سیل و سوات نا بشخ اٹی ملائیشیا نا زرکاری نا خواہندار ءِ۔ ملائیشین وزیر مس زارائیدہ بنت قمر الدین چیئرمین سینیٹ نا خیال آتیان امنا کرسا پارے کہ ہڑتوم آ ملک آتیٹی زرکاری نا گیشتر وارخواہی ساڑی ءِ زرگزران نا گچینی کن واپاری کچ اٹی ودکی و ساڑی زرکاری نا وارخواہی تیان فائدہ ہرفنگ المی ءِ۔ اوپارے کہ پاکستان ڈیہہ نا اہم ءُ ملک اسے ملائیشین زرکار، پاکستان اٹ زرکاری کننگ نا خواہندار ءُ۔
