کانود نا حکمرانی، آسودہی ریاست ، خودداری و آزاد خارجہ پالیسی لمہ وطن نا وتواجہی، شونداری و شونہالی نا ضامن ءِ، وزیراعظم عمران خان

اسلام آباد۔ 01 اپریل (اے پی پی) وزیراعظم عمران خان پارینےکہ پوسکن آ پاکستان اٹی کانود نا حکمرانی ، آسودہی ریاست، خودداری و آزاد خارجہ پالیسی بنداوی تمبہ غاک ءُ ہرا لمہ وطن نا وتواجہی ، شونداری و شونہالی نا ضامن ءُ، مستین اٹ پیشن نا امداد کن نن خودداری ، قومی سلامتی و زرگزرانی فائدہ غاتے گہیو تخان، پیشن نا امداد نا سوب آن تینا الس نا فائدہ غاتا بایدے سودا ءِ کننگپ، دابناآ ٹہیفوک آ پالیسی تا سوب آن بھلو قربانی اس الس تس و اونا فائدہ اشرافیہ ءِ مس، ننا مسہ سال انا دوراٹی خارجہ پالیسی ءِ ہرا شرف ملا مستین اٹی اونا درور ملپک۔ او جمعہ نادے آ اسلام آباد اٹی ’’اسلام آباد سیکورٹی ڈائیلاگ‘‘ آن تران کریکہ۔ داوخت آ قومی سلامتی نا سلاہکار ڈاکٹر معید یوسف ہم تران کرے۔ وزیراعظم پارے کہ سیکورٹی ڈائیلاگ نا اڈتننگ آ ڈاکٹر معید یوسف ءِ مبارکبادی پیش کینہ، دا ملک انا آخبت کن اہم ءِ، قومی سلامتی نا کثیر الجہتی مسخت ءُ، ہراملک آتیٹی غریب آتا سمندر اٹی امیر مخلوق نا اسہ چنکو جزیرہ اس مرے او ملک مدام بے رکھ مریک۔ وزیراعظم پارے کہ ہراتم ای مدینہ نا ریاست نا ہیت ءِ کیوہ تو اونا تصور ءِ سمجھنگ نا جاگہ غا دا پاننگ کہ وونٹ ہلنگ و سیاست کن مذہب ءِ کاریم اٹ اتیوہ، مدینہ نا ریاست نا بنداو کانود نا حکمرانی و آسودہی ریاست ئسک، ہنداڑآ او دنیا غا حکمرانی کرے و تہذیب و تمدن بدل مس، ننا قومی سلامتی نا بنداو ہم ہمودے، دادے پہہ مننگ نا گرج ءِ، ہراتم اسکان مچ آ قوم تینا قومی سلامتی کن سلپک دا 22 کروڑ نا مچی ہی سلک، فوج بیرہ محدود سیکورٹی تننگ کیک، الس ہراتم قوم اس جوڑ مرے تو او غٹ آن رکھ ملک و قوم اس جوڑ مریک، کیوبا نا درور مون آٹی ءِ۔ اوپارے کہ پاکستان نا قومی سلامتی نا بے رکھ مننگ نا غٹ آن بھلا سوب بے بریبری شونداری ءِ ہراڑے ہزگار و نیزگار اٹی فاصلہ ودا، اسہ محدود اشرافیہ اس وسیلہ غاتیا کوزہ کرے، نیزگار ءِ مون آ بننگ کن الیتو، انگلش میڈیم نظام تعلیم نا کمک اٹ پرخ ودی کننگا و دا تپہ غٹ آ کبین مس، جان جوڑی و تعلیم نا نظام بھس مس، بیرہ ہزگار کن جوان ہسپتال یا پیشن نا ملک درمان نا آسراتی دوئی ئسک، بیروزگاری و نیزگاری آ ریاست نا کنڈآن ہچ ءُ کمک اس کننگتوکہ۔ وزیراعظم پارے کہ کانود نا حکمرانی آن بیدس دنیا نا ہچ ءُ راج اس شون ہلنگ کپک، ہراڑے الس ءِ تینا جان و مال انا رکھ دوئی مریک ہموڑے او الس ریاست نا امور اٹی حصہ دار جوڑ مریک۔ وزیراعظم پارے کہ ہندا پرخ انا سوب آن مستین اٹ ہندوستان ءِ فتح کروک آک بیدس مزاحمت آن دہلی آ سرمسرہ، ہراڑے الس نا مفاد الوکہ ہموڑے او مزاحمت کتورہ، قبائلی علاقہ غاتیٹی جرگہ سسٹم نا سوب آن و تینا آجوئی کن اواری اٹ جنگ تسرہ، اوغانستان پیشن نا جلہو گیر آتا برخلاف مدام مزاحمت کرے۔ وزیراعظم پارے کہ او وار وار تینا قوم ءِ اقوام متحدہ نا دا رپورٹ نا حوالہ ءِ ایتک ہراٹی پاننگانے کہ 1600 ارب ڈالر سالانہ نیزگار ملک آتیان منی لانڈرنگ نا کمک اٹ ہزگار ملک آتیا گدریفنگک۔ وزیراعظم پارے کہ پاکستان ءِ تینا جوڑ مننگ آن دمدستی پد مہاجر آتون اوار ایلو بھلا ویل مون تروک ئسر ولے اوکان پد ہم 1960 نا دہائی ٹی پاکستان شونداری نا کنڈآ ہناکہ، اوکان پد بھلو کچ اسے آ کرپشن نا سوب آن ملک دا کسر آن اسہ کنڈ مس۔ وزیراعظم پارے کہ مسٹ میکو گڑا خودداری و آزاد خارجہ پالیسی ءِ، پیشن نا سیبو نا سوب آن ننا بھلو نسخان اس مس و نن تینا لائخی تیان خاطر خواہ فائدہ ہرفنگ کتون، نن تینا آمخی تا جاچ ءِ ہلنگ نا کوشست کتون، آزاد خارجہ پالیسی آن قوم جوڑ مریک، اوٹی قوم انا فائدہ اولیت مریک، نن وخت اس ہم داہیت انا جاچ ءِ ہلتون کہ اوغان جہاد اٹی شریداری آن نن انتس کٹان و گوہان، تینا اوغان ایلم تیا پیشن نا جلہوگیر تا برخلاف نن اوفتا کمک ءِ کرین ولے اونا بے کنڈہلوک جاچ ءِ کننگتو کہ انت نن دا جنگ اٹی اوغان تا کمک کن شرکت کرین دا دا شریداری ڈالر آتیکن ئسک، اگہ نن ڈالر آتیکن دا کرین تو نن ملوک آ امداد آن بھاز زیات نسخان کرین، 50 لکھ اوغان مہاجر آتون مون تروئی تما، فرقہ واریت ، منشیات تون مون تروئی تما، ملک اٹی کرپشن ودا، 2000ء آن پد نن تینا پالیسی ٹی 180 ڈگری نا یوٹرن ہلکن، پدتموک ملک آک ننے آن مون آ پیش تمار، پیشن نا امداد آ سیبو آن ننا مخلوق اٹ گچینی بتو بلکن داڑآن ملک انا مفاد ءِ قربان کننگا۔ وزیراعظم پارے کہ آزاد خارجہ پالیسی نا حامل مفروک آ ملک وخت اس ہم دنیا ٹی شرف خنپک، و نئے تینا ملک انا مخلوق نا مفاد عزیز ئس۔ وزیراعظم پارے کہ نن آزاد خارجہ پالیسی کن کوشست کرین، تینا ملکی و السی فائدہ غاتے مقدم تخنگ نا کوشست کرین، ننا مسہ نیم سال اٹی خارجہ پالیسی ءِ ہرا شرف ملا مستین اٹی وخت اس ہم ملتنے۔ اوپارے کہ روس انا ساڑی آ دورہ غا اسہ واکدار ملک اس ننے آن ناراض ءِ، ہندوستان روس آن تیل انا خریدار ءِ ولے اونا پورو کمک ءِ کننگ انگ ءِ، برطانیہ نا اسہ زموار اسے نا بیان مون آ ن گدرینگا کہ او بھارت ءِ آزاد خارجہ پالیسی نا سوب آن ہچ پاننگ کپک ۔ قومی سلامتی نا سلاہکار ڈاکٹر معید یوسف داوخت آ تران کرسا پارے کہ دا قومی ڈائیلاگ اٹی ایشیانا ہفت ملک آتا قومی سلامتی نا سلاہکار بشخ ہلنگ ءُ، داڈائیلاگ اٹی ایشیائی سیکورٹی ٹی کمکاری آ سجفنگک، داوڑنا فورم تیا گیشتر سرکاری کمامدارآک شریک مریرہ ولے نن اوڑآن اسہ کنڈ مخلوق ءِ سلہ خلکونن۔