سفارت خانہ پیشن نا ملک بندی و دزگیر 11764 پاکستانی تے غٹ ممکن کانودی و قونصلر کمک فراوان کننگ اُن
اسلام آباد۔ 19اپریل (اے پی پی) قومی اسمبلی ئِ پاننگانے کہ بلغاریہ ٹی 6 پاکستانی شاری ئِ سزا تننگانے، پاکستانی مشن بلغاریہ نا کمامدارآتون خڑکی رابطہ غاتیٹی ئِ، پاکستانی شاری تے غیر کانودی وڑاٹ پاکستانی تے پیشن نا ملک آ گدریفوک آ پروموٹرز آتا برخلاف کارروائی کننگانے۔ چارشنبے نا دے قومی اسمبلی ٹی وقفہ سوج آتیٹی شیخ روحیل اصغر و غوث بخش مہر نا سوج انا ورندی ٹی وزیراعظم نا سلاہکار خارجہ امور سرتاج عزیز پارے کہ 6 پاکستانی تے بلغاریہ ٹی سزا تننگانے وخت اس کہ 99 قید خانہ غاتیٹی ئُ اوخلقت قید خانہ غاتیٹی مریرہ اوفتے ملک بدر کننگک، نن اوفتے ہروڑنا کمک فراوان کننگ اُن۔ بلغاریہ نا جیل آتیٹی پاکستانی شاری تے بند کننگ نا بنداوی سوب غیر کانودی وڑاٹ سیم ئِ عبور کننگ ئِ۔ پاکستانی تا قومیت نا سخت وڑاٹ جانچ پڑتال کننگک۔ صوفیہ ٹی ننا مشن بلغاریہ نا کمامدارآتون خڑکی رابطہ ٹی ئِ۔ نادار پاکستانی نا دروشم اٹ مشن قیدی تے المی کانودی و مالی کمک فراوان کیک۔ ترکی ٹی 300آن زیات پاکستانی بندئُ اوفتے یورپ آن پدی گدریفنگک۔ غیر کانودی وڑاٹ پاکستانی تے پیشن نا ملک آ گدریفوک آ پروموٹرز آتا برخلاف کارروائی کننگانے۔ ایس اے اقبال قادری نا سوج آ وزیراعظم نا سلاہکار خارجہ امور سرتاج عزیز پارے کہ داوخت آ پیشن نا ملک 11764 پاکستانی بند و دزگیر بندغ ئُ، پاکستانی سفارت خانہ دا بندی و زیر حراست بندغ آتے غٹ ممکنہ کانودی و قونصلر کمک فراوان کننگ ئِ۔
