اسلام آباد۔ 30 مارچ (اے پی پی) وزیراعظم عمران خان پارینے کہ بے پتی جمہوری وڑ و سیاسی تنکی پارلیمانی جمہوریت نا بشخ اسے ولے ساڑی آ بے پتی پیشن نا سازش اسے، فیصلہ کرینن کہ دا سازش نا دستاویزی شاہدی تے سینئر صحافی تے نشان ایتنہ وخت اس کہ ردینک اٹ دا سازش نا بشخ جوڑ مروک سیوتی تا نمائندہ غاتے ہم دا دستاویزی شاہدی تے نشان ایتنہ، باسک آک انت کہ فیصلہ اس کننگ خوار کیر، ولے دا ضرور سجفر کہ او پاکستان نا برخلاف جہانی سازش اسے نا بشخ مفس، ای پاسپورٹ پاکستان اٹ سیل و سوات نا مون آ دننگ و پردیسی تیکن اسہ بھلو آسراتی اس مریک، پاکستان نا آخبت نا دارومدار سیل و سوات آٹی ءِ، نن سیل و سوات ءِ صنعت نا درجہ تسونن۔ چارشنبےنادے آ اسلام آباد اٹی ای پاسپورٹ نا بنانا وخت آ تران کرسا وزیراعظم وزارت داخلہ و نادرا ءِ دا آسراتی نا بناآ مبارکبادی ترسا پارے کہ دنیا ٹی ٹیکنالوجی مخلوق نا زند اٹی آسانی ودی کرے، داڑآن کرپشن چٹا، شوکت خانم ہسپتال اٹی 22 سال مست نن مچ آ نظام ءِ پیپر لیس کریسن، داڑآن ہسپتال اٹی دوائی یا ایلو چنکا کرپشن اٹی نمان کمتی بس۔ وزیراعظم پارے کہ ملک اٹی اسہ پیٹی کرپشن مریک و ایلو بھلو کچ اسے آ کرپشن ءِ، دُن کہ نیشنل ہائی وے اتھارٹی 2013 نا مقابلہ ٹی 2021 اٹی جوڑ مروک آ موٹروے تا فی کلو میٹر خڑچ 23 کروڑ روپئی کم ئس، ہنداوڑ اسہ ہزار ارب روپئی نا کرپشن کننگا، ای ٹینڈرنگ آن داٹی نمان کمتی بسنے۔ وزیراعظم پارے کہ دا ملک انا خواری کش تپہ ہرا پیشن نا ملک آ ہنسا خواری کیک و اونا گدریفوک آ ترسیلات زر آن کرنٹ اکاؤنٹ نسخان و درآمد و برآمد آتیٹی بروک آ پرخ ءِ مر کننگ اٹ کمک رسینگک، اینخو سال پردیسیک 31 ارب ڈالر نا ریکارڈ ترسیلات زر گدریفیر، داپردیسی تے اخس کہ آسراتی تننگے کم ءِ۔ اوپارے کہ ای پاسپورٹ رکھ ہم ارے و داڑآن وخت انا بچت و زیات آسراتی دوئی بننگ تون اوار اوار ملک انا سیل و سوات ءِ فائدہ مریک، پاکستان نا آخبت کن سیل و سوات نا کڑد بھاز اہم مریک، درآمد و برآمد آتیٹی بروک خلیج ءِ ترسیلات زر و سیل وسوات آن مرکننگ مریک۔ وزیراعظم پارے کہ پاکستان نا دا خوش بختی ءِ کہ اودے ہروڑنا سیل و سوات نا پرکشش مرکز نا ہند دوئی ءِ، نن سیل و سوات ءِ صنعت نا درجہ تسن، ریزارٹ جوڑ کننگ کن آسراتی تننگ اُن انتئے کہ سیل وسواتی تا دا ریزارٹ اٹی اڈکننگ آن پاکستان ءِ سرمایہ دوئی مریک، نن سکردو ءِ جہانی ہوائی اڈہ جوڑ کرین انتئے کہ موسم نا خرابی نا سوب آن اسلام آباد آن سکردو و گلگت آ ہنوک آ جہاز آک کیہی کیہی دے تاخیر نا گواچی مسرہ ہراڑآن چٹھی تے اڈتننگ کن مخلوق نا وخت زیان مسکہ، سکردو نا انٹرنیشنل بالی پٹ آن داسہ براہ راست جہاز آک بریرہ۔ وزیراعظم پارے کہ داملک اٹی داخہ وارخواہی و لائخی ارے کہ داہراکان ہراڑے سرمننگ کیک۔ وزیراعظم پارے کہ پارلیمانی جمہوریت اٹی سیاسی تنکی بریک کاہک و بے پتی اسہ جمہوری ءُ عمل اسے ولے ساڑی آ بے پتی نا تحریک پیشن نا سازش اسے ، ہرا فک پیشن نا ملک آتیان اسہ ٹیل فون آ مچ آ ملک ءِ کنٹرول کریرہ اوفک دا اسُل سگنگ کپسہ کہ ہندن ءُ سرکڑدہ اس برے ہرا ملک انا فائدہ ٹی فیصلہ کے۔ اوپارے کہ مستین اٹی دہشت گردی نا برخلاف جنگ اٹی ملک انا بھلو جانی و مالی نسخان مس ، قبائلی علاقہ غاتیان 35 لکھ مخلوق ہمپیر، داڑے ڈرون جلہو کننگا ولے کس اس اونا سوب نا اَریفتو، پین ملک اسے فائدہ تننگ کن تینا ملک انا فائدہ نا سودا ءِ کننگا۔ وزیراعظم پارے کہ آزاد خارجہ پالیسی ٹی تینا ملک انا فائدہ غاتے مقدم تخنگک ، بے پتی نا سازش نا دستاویزی شاہدی ءِ سینئر صحافی تے نشان تننگ نا فیصلہ کرینن تانکہ قوم ءِ راستکی معلوم مرے ، تینا ملک انا گیشتر فائدہ ٹی دا شاہدی ءِ کس اسے نشان تتونہ، ولے دا شک ودی کننگ انگ ءِ کہ دا راگ و گوازی اسے، ہنداخاطرآن دا شاہدی ءِ چوٹی نا صحافی تے نشان تننگ نا فیصلہ کرینن۔ وزیراعظم داوخت آ ای پاسپورٹ نا بناءِ ہم کرے۔ وزیرداخلہ شیخ رشید احمد دود اٹی بننگ آ وزیراعظم ءِ بخیر کرے۔
