بیجنگ۔ 30 مارچ (اے پی پی) چین اٹی اڈ ہلوک آ اوغانستان نا ہمسایہ ملک آتا مسٹ میکو دیوان نا وخت آ وزیرخارجہ مخدوم شاہ محمود قریشی تون چارشنبےنادے آ ہوانگ شان اٹی چینی اسٹیٹ کونسلر و وزیر خارجہ وانگ یی ئسک اوڑدہی کریر۔ وزیرخارجہ چین نا ریاستی کونسلر و وزیر خارجہ وانگ یی تون چارشنبے نادے آ چین نا شار ہوانگ شان نا تونسی ڈسٹرکٹ اٹی ہڑتوم آ کنڈآتا اوڑدہی کرے۔ سیکرٹری خارجہ سہیل محمود و چین اٹی تعینات پاکستانی سفیر معین الحق ئسک ہم اوڑتون اوارساڑی ئسر۔ دفترخارجہ نا رداٹ چینی وزیرخارجہ وانگ یی اوغانستان نا ہمسایہ ملک آتا مسٹ میکو دیوان اٹی بشخ ہلنگ و چین آ بننگ آ وزیرخارجہ مخدوم شاہ محمود قریشی نا منت واری ءِ ہرفے۔ ہڑتوم آ وزیرخارجہ غاک داکان مست 21 مارچ 2022آ اسلام آباد اٹی او آئی سی وزراء خارجہ کونسل نا چل ءُ ہشت می دیوان نا وخت آ اوڑدہی کریسس۔ ہڑتوم آ وزیر خارجہ غاک ہڑتوم آ کنڈآتا سٹریٹجک ، اقتصادی و سیکورٹی کمکاری آ ہم گپ وتران کریر۔ ہڑتوم آ وزیر خارجہ غاتا نیام اٹ ، جہانی دین، اوغانستان اٹی امن و سوگوی و تین پہ تینی است خواہی نا علاقائی و جہانی امور آ ہم گپ وتران مس۔ وزیرخارجہ پاکستان نا خارجہ پالیسی ٹی چین نا مرکزی حیثیت نا حوالہ ءِ ترسا ’’پاک چین آل ویدر اسٹریٹجک کو آپریٹیو پارٹنر شپ ‘‘ ءِ پین کڑمب و سوگو کننگ نا عزم انا درشانی ءِ کرے۔ وزیرخارجہ پاکستان نا کنڈآن ، چین نا ’’ون چائنہ‘‘ پالیسی و چین نا بنداوی فائدہ غاتا مخ تفی نا درشانی ءِ کرے۔ تدوک آ تُو وزیراعظم نا دورہ چین و اسٹیٹ کونسلر وانگ یی نادورہ اسلام آباد نا ذکر ءِ کرسا وزیرخارجہ پاک چین تعلقداری نا ودکی نا رفتار ءِ ستاکڑزوک گوندا۔ ہڑتوم آ وزیر خارجہ غاک امنا کریر کہ سی پیک فیز IIنا بڑزکو آب، صنعتی شونداری، کشاری بشخ اٹی پوسکنی و انفارمیشن ٹیکنالوجی کون آ بشخ آتیٹی ہڑتوم آ کنڈآتا کمکاری، کثیر الجہتی شریداری نا درشانی ءِ۔
