اسلام آباد۔ 30 مارچ (اے پی پی) بنجائی وزیر داخلہ شیخ رشید احمد پارے کہ عمران خان مقدر نا سکندر ءِ، ای گمر کیوہ کہ ای عمران خان تون اُٹ، ضمیر ءِ بہاکروک آک بے سہب مریرہ، عمران خان ءِ ہرا مقبولیت داوخت آ دوئی ءِ دا لس گچین کاری تیٹی ہم الوکہ۔ چارشنبے نادے آ اسلام آباد اٹی ای پاسپورٹ نا بنانا وخت آ تران کرسا وزیر داخلہ پارے کہ چنک سوچ تخوک آ مخلوق ہرافتا نزوری مال ءِ و او مستین اٹی کرنل قذافی و اسامہ بن لادن آن مال مچ کرسا کریر، او عمران خان نا برخلاف اسٹ مسنو، شریف خاہوت میموگیٹ سکینڈل اٹی مون ءُ کوٹ اس بینسا زرداری نا برخلاف پیش مس و اینو اسٹ مسر، کنے غٹ سماءِ کہ دا امر مہالو شاہ عبداللہ نا کمک اٹ زور شاغسا نرار، فوج خواتوکہ کہ دا پیشن کائے، بلاول بھٹو اونا برخلاف مودی نا یار انا نعرہ خلسا کرے۔ وزیر داخلہ پارے کہ ای سیاسی ورکراسے اُٹ و پورو کوشست مسنے کہ وزارت اٹی لس بندغ ءِ آسراتی رسینگے، ای پاسپورٹ آن داسہ داٹی مروک آ پیش رفت اُراٹی تولسا ہُننگ مریک، مہالوپاسپورٹ جوڑ کننگ اٹی ہم کرپشن ئسک۔ وزیرداخلہ پارے کہ اجمل قصاب نا خلق فرید کوٹ نا ڈس ءِ نواز شریف تس، اگہ دا معلومداریک غلط مریر تو کنے انت سزااس ملے کنے قبول مریک۔ اوپارے کہ ای گمر کیوہ کہ ای وزیراعظم تون اواری اٹ سیاست کریٹ، ہرامقبولیت داوخت آ عمران خان ءِ دوئی ءِ لس گچین کاری تا وخت آ ہم الوکہ۔ اوپارے کہ ای وزیراعظم ءِ پاریٹہ کہ اسمبلی تے پرغے و پوسکن گچین کاری تیاکائے، ای عمران خان تون سلوک اُٹ۔ اووزیراعظم ءِ پارے کہ نالہ لئی آ ایکسپریس وے کنا تغ ءِ وخت اس کہ اسلام آباد پولیس نا تنخواہ تیٹی نمان ودکی نا ہم خواست ءِ۔
