راولپنڈی۔ 30 مارچ (اے پی پی) صوبائی وزیر جان جوڑی ڈاکٹر یاسمین راشد پارینے کہ پنجاب اٹی ہب اینڈ سپوک ماڈل گچین مروک سرکاری ہسپتال آتیٹی ناجوڑ آتا گچین درمان ءِ پک کننگ نا کنڈآ اہم ءُ گام اسے۔ ہب اینڈ سپوک ماڈل نا رداٹ ڈسٹرکٹ ہیڈکوارٹر، تحصیل ہیڈکوارٹرہسپتال و ٹراما سینٹر آتے سرکاری میڈیکل یونیورسٹی تتون گنڈنگانے۔ ہب اینڈ سپوک ماڈل نا کمک اٹ پنجاب نا ڈسٹرکٹ ہیڈکوارٹر، تحصیل ہیڈکوارٹر ہسپتال و ٹراما سینٹر آتیٹی بروک آ ناجوڑ آتے گچین طبی آسراتی فراوان مریک۔ داخیال آتا درشانی ءِ وزیرجان جوڑی ڈاکٹر یاسمین راشد راولپنڈی میڈیکل یونیورسٹی ٹی ہب اینڈ سپوک ماڈل آ پریس کانفرنس کرسا کرے۔ اوپارے کہ پروجیکٹ نا رداٹ میڈیکل یونیورسٹی تا ڈاکٹر منسلک ڈی ایچ کیو،ٹی ایچ کیو ہسپتال و ٹراما سینٹر آتیٹی فرض ءِ سرایترہ۔ پروجیکٹ نا رداٹ میڈیکل یونیورسٹی تا ڈاکٹر آک ناجوڑ آتا درمان ءِ کننگ تون اوار اوار ڈی ایچ کیو، ٹی ایچ کیو ہسپتال و ٹراما سینٹر آتیٹی تعینات ڈاکٹر آتا کسبی تربیت ءِ ہم کیرہ۔ غٹ آن مست ہب اینڈ سپوک ماڈل راولپنڈی میڈیکل یونیورسٹی ، فیصل آباد میڈیکل یونیورسٹی و نشتر میڈیکل یونیورسٹی آن بناکننگ انگءِ۔ ڈاکٹر یاسمین راشد پارے کہ ہب اینڈ سپوک ماڈل ءِ اینخو مالی سال آن مہالو بناکننگانے۔ پنجاب نا سرکاری ہسپتال آتیٹی بروک آ ناجوڑ آتے درمان نا گچین آسراتی فراوان کننگ کن کوشست کننگ ءِ۔ راولپنڈی ، فیصل آباد و ملتان ڈویژن آتیٹی ہب اینڈ سپوک ماڈل نا رداٹ گنڈوک سرکاری ہسپتال آتیٹی ڈاکٹر آتا کمتی ءِ اولیتی بنداو تیا پورو کننگک۔ وزیر جان جوڑی مستی پارے کہ ہب اینڈ سپوک ماڈل نا کمک اٹ گنڈوک سرکاری ہسپتال آتیٹی آئی ٹی انفراسٹرکچر، ایمبولینس آتا فراوانی، ڈاکٹرآتا ہنکینی، لیبارٹری سروس، ریڈیالوجی سروس، آپریشن تھیٹر، کیئر سینٹر، کمیونٹی آوٹ ریچ کیمپس، فنانشل آٹانومی ، ایچ آر الاؤنس ، کوالٹی منیجمنٹ و مانیٹرنگ اٹی گچینی بریک۔ وخت اس کہ راولپنڈی، فیصل آباد و ملتان ڈویژن تیٹی ہب اینڈ سپوک ماڈل نا سرسہبی آن پد دا پروجیکٹ ءِ صوبہ نا کہول آ تالان کننگک۔
