اسلام آباد۔ 29 مارچ (اے پی پی) وزیراعظم عمران خان پارینے کہ اپوزیشن نا منت وار اُن ہرافتا سازش آتا سوب آن نئے بیرہ پارٹی بلکن الس ٹی پاکستان تحریک انصاف کن مقبولیت و جوش و جوزہ نا پوسکن ءُ ریسہ اس ودی مس، ملک انا تاریخ نا غٹ آن بھلا السی مچی پاکستان تحریک انصاف آ السی پت انا شاہدی ءِ۔ سے شنبے نادے آ وزیراعظم عمران خان تون سندھ آن تعلق تخوک آ قومی اسمبلی نا باسک، صوبائی سندھ اسمبلی و پارٹی عہدیدار آک اوڑدہی کریر۔ اوڑدہی ٹی بنجائی وزیر علی زیدی، فواد چوہدری و گورنر سندھ عمران اسماعیل ئسک ہم اوار ئسر۔ داوخت آ وزیراعظم پارے کہ پاکستان تحریک انصاف قومی کہول آ ملک انا اسٹ آگراس روٹ لیول نا جماعت ءِ، پیسہ غاتے اٹ السی مچی پُر مفک ، ہراتم قوم ملک انا تقدیر ءِ بدل کننگ کن پیش تمک تو السی مچی امر بالمعروف کون مریک۔ وزیراعظم پارے کہ نما غٹ اٹی ہمو دروشم نظر بننگ ءِ ہرافک پارٹی ٹی ورکرنا وڑاٹ شمولیت اختیار کریرے و اینو ایوان تیٹی تینا حلقہ غاتا نمائندگی ءِ کننگ اورے، ہراتم حکمران تا نیت ساف مرے تو اخس کہ بھلو تہہ یا پیشن سازش مرے ، بے سہب مریک۔ اوڑدہی ٹی بشخ ہلوک آک وزیراعظم ءِ پاکستان تحریک انصاف نا سندھ حق مارچ و اسلام آباد اٹی السی مچی امر بالمعروف نا تاریخی سرسہبی آ مبارکبادی پیش کریر۔ داکان بیدس وزیراعظم نا کماشی آ پورو پت انا درشانی ءِ کرسا حکومت نا شونداری ڈٹ، سرسہب خارجہ پالیسی و ناموس رسالت صلی اللہ علیہ و آلہ وسلم و اسلاموفوبیا کن وزیراعظم نا جہانی کہول آ کوشست و اقوام متحدہ ٹی قرارداد آتا منظوری آ خراج تحسین پیش کریر۔ وزیراعظم گچین مروک آ نمائندہ و پارٹی عہدیدار آتے سندھ اٹی پارٹی تنظیم ءِ پین سوگو کننگ خاص وڑاٹ ضلعی کہول آ پارٹی ءِ پین سوگو کننگ نا پارت جاری کرے۔
