اسلام آباد۔ 29 مارچ (اے پی پی) وزیر داخلہ شیخ رشید احمد پارینے کہ تحریک بے پتی کن پیشن آن فنڈنگ مننگ ءِ، ہرافک جہانی کہول آ سازش کرینو او بے سہب مریرہ، پی ٹی آئی نا ساڑی آ السی مچی پک کرے کہ قوم وزیراعظم عمران خان تون ہم کوپہ سلوک ءِ ، (ق) لیگ اتون تین پہ تینی رضامندی اٹ باندات طے مسنے ، است خواہی ءِ کہ ایم کیو ایم ہم حکومت تون برے، تحریک بے پتی آ ووٹنگ 3 اپریل آ مریک۔ سے شنبے نادے آ پریس کانفرنس آن تران کرسا وزیرداخلہ پارے کہ سیکورٹی فورس آک ناپاک عزم تخوک آ چار دہشت گرد آتے دزگیر کرینو ، اوفتا برخلاف انسداد دہشت گردی نا عدالت آتیٹی مقدمہ چلیفنگک۔ وزیر داخلہ بنجائی دارالحکومت اٹی السی مچی نا پرامن اڈتننگ آ است جمی نا درشانی ءِ کرے۔ اوپارے کہ وزارت داخلہ اسہ تُو آن جلسہ جلوس، مارچ و او آئی سی کانفرنس اٹی اختہ ئس و غٹ باندات خیروعافیت اٹ ایسر مس ہراڑآ غٹ فورس آتے مبارکبادی پیش کیوہ، داسہ کنٹینر آتے ہرفنگانے و غٹ سڑک آتے ساف کننگانے۔ شیخ رشید احمد پی ایم ایل (ق) نا کنڈآن وزیراعظم عمران خان نا مخ تفی نا فیصلہ نا ستاءِ کرسا پارینے کہ مسلم لیگ (ق) بھاز جوان ءُ فیصلہ اس کرینے ، (ق) لیگ اتون غٹ باندات تین پہ تینی رضامندی اٹ طے مسنے۔ اواومیت ظاہر کرے کہ متحدہ قومی موومنٹ ہم دانا پیروی ءِ کیک۔ وزیر داخلہ پارے کہ مچ آ قوم وزیراعظم تون ہم کوپہ سلوک ءِ و اونا درشانی اسلام آباد اٹی پی ٹی آئی نا ساڑی السی مچی ٹی نظر بسنے۔ بنجائی وزیر داخلہ شیخ رشید پارے کہ بے پتی آ ووٹنگ مسہ اپریل آ مریک۔ 31 تاریخ آ بے پتی آ شرہ مریک اوکان پد ووٹنگ مسہ اپریل آ مریک، مسہ اپریل آ ووٹنگ نا عمل جوانی اٹ سرتننگک۔ تحریک بے پتی نا فیصلہ آخیریکو گھنٹہ اسکان کاہک، شیخ رشید پارے کہ سیوتی تا بارواٹ پاریسن کہ ق لیگ ننتون بریک، داسہ دعا ءِ ایم کیو ایم ہم ننتون برے انتئے کہ ایم کیو ایم نا فیصلہ بھاز فیصلہ کن مریک ولے مذاکراتی کمیٹی ٹی اوار اف۔ اوپارے کہ پیشن نا فنڈنگ آن عمران خان ءِ بِٹنگ نا کوشست کننگ انگ ءِ ہرافک عمران خان ءِ اینک کننگ کن انٹرنیشنل سازش و زرکاری کریر او بے سہب مریرہ۔ اومستی پارے کہ کوشست ءِ مسہ تاریخ آ اپوزیشن 172 بندغ پورو کننگ کپ۔ اوپارے کہ گورنر پنجاب وزیراعلیٰ عثمان بزدار نا استیفہ نا نوٹیفکیشن ءِ جاری کیک، عثمان بزدار ہِننگ تون راولپنڈی ٹی یونیورسٹی نا منظوری ءِ ہم تسنے، راولپنڈی اولیکو شار مریک ہراڑتون 5 یونیورسٹی مریک۔ اسہ سوج اسے نا ورندی ٹی وزیرداخلہ پارے کہ اونا مسہ خواہش ءُ اول قوم وزیراعظم عمران خان تون سلے، دوم نالہ لئی ڈٹ جوڑ مرے و ساف شفاف و بے کنڈہلوک گچین کاری مرے۔
